భారీ వర్షాలతో తడిసి ముద్దయిన నగరం

హైదరాబాద్‌లో ఇవాళ మధ్యాహ్నం 12 గంటల నుంచి ఆగకుండా కురుస్తోన్న భారీ వర్షానికి నగరంలోని అనేక ప్రాంతాలు పూర్తిగా జలమయమయ్యాయి. రోడ్లన్నీ చెరువులని తలపిస్తున్నాయి. ఇక లోతట్టు ప్రాంతాల పరిస్థితి మరింత అధ్వాన్నంగా తయారైంది. కొన్ని ప్రాంతాల్లో నిన్న సాయంత్రం నుంచి, ఇంకొన్ని ప్రాంతాల్లో ఇవాళ ఉదయం నుంచే వర్షపాతం నమోదవుతుండటంతో రోడ్ల మీదకు భారీగా వరద నీరు వచ్చిచేరుతోంది. దీంతో చాలా ప్రాంతాల్లో వాహనాల రాకపోకలకి తీవ్ర అంతరాయం ఏర్పడుతోంది. ఫలితంగా రోడ్లపై వాహనాలు ఎక్కడికక్కడ నిలిచిపోయాయి. రద్దీగా వుండే ప్రాంతాల్లో ట్రాఫిక్ జామ్ ఇబ్బందులు తప్పడం లేదు. నగరంలో ఇక్కడ, అక్కడ అని తేడాలేకుండా అనేక ప్రాంతాల్లో వర్షం ఎడతెరిపిలేకుండా కురుస్తోంది.

నిన్న సాయంత్రం నుంచే ఎడతెరిపి లేకుండా కురుస్తోన్న భారీ వర్షం నగరాన్ని చిగురుటాకులా వణికించింది. నాలుగైదు రోజుల క్రితం కురిసిన భారీ వర్షం దెబ్బ నుంచి ఇంకా కోలుకోకముందే మళ్లీ మొదలైన వాన నగరవాసులని ఆందోళనకు గురిచేస్తోంది. ముఖ్యంగా లోతట్టు ప్రాంతాల వాసులు, నాలాలు పొంగిపొర్లుతున్న ప్రాంతాల్లో నివాసం వుంటున్న వాళ్లు ఈ వర్షాలని చూసి ఏ క్షణం ఏం జరుగుతుందా అని భయాందోళనలకి గురవుతున్నారు.

ఇదిలావుంటే, వరుసగా కురుస్తోన్న వర్షాల కారణంగా శిథిలావస్థకు చేరుకున్న పాత భవనాలు, నిర్మాణాలు కూలిపోయే ప్రమాదం వున్నందున నగరవాసులు తగిన జాగ్రత్తలు తీసుకుని అటువంటి కట్టడాలకి దూరంగా వుండాలని జీహెచ్ఎంసీ అధికారులు సూచిస్తున్నారు. ప్రమాదకరమైన భవనాలని గుర్తిస్తున్న జీహెచ్ఎంసీ సిబ్బంది.. ఆయా భవనాల్లో నివాసం వుండేవారిని ఖాళీ చేయించి వారిని తాత్కాలికంగా సురక్షిత ప్రాంతాలకి తరలించే ఏర్పాట్లు చేస్తున్నారు. హైదరాబాద్ పోలీసులు సైతం నగరవాసులకి ఎటువంటి ఇబ్బందులు తలెత్తకుండా తమవంతు జాగ్రత్తలు తీసుకుంటున్నారు. ట్రాఫిక్ జామ్ అవుతున్న ప్రాంతాలు, నాలాలు పొంగిపొర్లుతున్న ప్రాంతాల్లో ప్రస్తుతానికి వాహనాల రాకపోకలు నిలిపేశారు.