Hyderabad: నగరానికి భారీ వర్షం.. తెలంగాణలో విస్తారంగా వానలు

హైదరాబాద్‌లోని పలు ప్రాంతాల్లో ఓ మోస్తరు వర్షం కురిసింది. జూబ్లీహిల్స్, బంజారాహిల్స్, పంజాగుట్ట, అమీర్‌పేట, మెహిదీపట్నం, సికింద్రాబాద్, వారసిగూడ, కుత్బుల్లాపూర్‌, జీడిమెట్ల, షాపూర్‌ నగర్, సూరారం, చింతల్, సుచిత్ర తదితర ప్రాంతాల్లో బుధవారం (జులై 31) మధ్యాహ్నం వర్షం కురిసింది. రోడ్లు జలమయం కావడంతో వాహనదారులు, పాదచారులు ఇబ్బందులు పడ్డారు. మరికొద్ది గంటల్లో నగరంలో భారీ వర్షాలు కురిసే అవకాశం ఉన్నట్లు వాతావరణ శాఖ హెచ్చరించింది.

హైదరాబాద్‌ నగర పరిధిలో రానున్న గంటల్లో భారీ వర్షం పడే అవకాశం ఉన్నట్లు వాతావరణ శాఖ హెచ్చరించిన నేపథ్యంలో ముందస్తు చర్యలు చేపట్టామని జీహెచ్‌ఎంసీ కమిషనర్ దానకిశోర్ తెలిపారు. జీహెచ్‌ఎంసీ సిబ్బందిని, అధికారులను అప్రమత్తం చేసినట్లు వెల్లడించారు. భారీ వర్ష సూచన నేపథ్యంలో అత్యవసర సహాయక బృందాలను అప్రమత్తం చేసినట్లు తెలిపారు.

Read Also: శ్రీశైలం వైపు కృష్ణమ్మ పరవళ్లు..

తెలంగాణలోని పలు జిల్లాల్లో వానలు కురుస్తున్నాయి. పలు ప్రాజెక్టుల్లోకి నీటి ప్రవాహం కొనసాగుతోంది. ఎగువన కురుస్తున్న వర్షాలతో గోదావరి నదిలో ప్రవాహం పెరుగుతోంది. భద్రాచలం వద్ద గోదావరి ప్రవాహం అంతకంతకూ పెరుగుతోంది. పలు ప్రాంతాల్లో వాగులు, వంకలు పొంగిపొర్లుతున్నాయి.

మరో రెండు రోజుల పాటు వర్షాలు కురుస్తాయని వాతావరణ శాఖ తెలిపింది. రాష్ట్రంలో నైరుతి రుతుపవనాలు చురుగ్గా కదులుతున్నాయని వెల్లడించారు. మరో 10 రోజుల పాటు విడతలు విడతలుగా వానలు కురిసే అవకాశం ఉన్నట్లు తెలిపారు. మరోవైపు ఒడిషా ప్రాంతంలో ఉపరితల ఆవర్తనం కొనసాగుతోందని.. అది తుఫానుగా మారితే తెలంగాణ వ్యాప్తంగా భారీ వర్షాలు కురిసే అవకాశం ఉందని తెలిపారు.