భాగ్యనగరంలో కుండపోత.. ఉదయాన్నే నరకం చూపించిన ట్రాఫిక్

భారీ వర్షం కారణంగా హైదరాబాద్ నగరం తడిసి ముద్దయ్యింది. బుధవారం ఉదయాన్నే కుండపోతగా వర్షం కురవడంతో.. జనాలు తీవ్ర ఇబ్బందులు ఎదుర్కొన్నారు. రోడ్ల మీద నీరు నిలవడంతో వాహనదారుల పరిస్థితి వర్ణనాతీతంగా మారింది. ట్రాఫిక్ స్తంభించడం, రోడ్లన్నీ జలలమయం కావడంతో ఉదయాన్నే రోడ్డెక్కిన వారికి నరకం కనిపించింది. ఎర్రమంజిల్, పంజాగుట్ట, ఎస్ఆర్ నగర్, కూకట్‌పల్లి, హైటెక్ సిటీ, గచ్చిబౌలి తదితర ప్రాంతాల్లో కుండపోత వర్షం కురిసింది.

ఊహించని రీతిలో భారీ స్థాయిలో వర్షం కురవడంతో టూ వీలర్లపై వెళ్తున్న వారు పూర్తిగా తడిసి ముద్దయ్యారు. ఖైరతాబాద్ నుంచి పంజాగుట్ట వరకు రోడ్డు మీద నీరు నిలిచిపోవడంతో.. వాహనాలు ఎక్కడిక్కడే ఆగిపోయాయి. హైటెక్ సిటీ ప్లై ఓవర్ పూర్తిగా నీటితో నిండిపోయింది. మంగళవారం సాయంత్రం కూడా నగరంలో ఓ మోస్తరు వర్షం కురిసింది.
నగరంలో భారీ వర్షం కురుస్తుండటంతో జీహెచ్ఎంసీ అప్రమత్తమత్తమైంది. అధికారులు అందుబాటులో ఉండాలని జీహెచ్‌ఎంసీ కమిషనర్‌ దాన కిశోర్‌ ఆదేశాలు జారీ చేశారు. డిజాస్టర్‌ ఎన్‌ఫోర్స్‌మెంట్‌ బృందాలను రంగంలోకి దింపారు.