​మహానగరంలో వర్ష భీభత్సం

హైదరాబాద్ కుండపోత వర్షంతో బుధవారం అర్థరాత్రి చిగురుటాకులా వణికింది. దాదాపు అన్ని పాంతాల్లోనూ భారీ వర్షం కురిసింది. రహదారులు పూర్తిగా జలమయం అయ్యాయి. వాహనదారులు తీవ్ర ఇక్కట్ల పాలయ్యారు. నారాయణగూడలో అత్యధికంగా 7.7 సెం.మీ వర్షపాతం నమోదైంది. రాంనగర్ ప్రాంతంలోని నాలా ప్రమాదకర స్థాయిలో పొంగిపొర్లింది. ఓ గుడిసెలోకి భారీగా నీరు చేరడంతో రాంనగర్ లో వృద్ధుడు మరణించాడు. ఎలాంటి పరిస్థితులనైనా ఎదుర్కొడానికి సిద్ధంగా ఉండాలని జీహెచ్ఎంసీ అధికారులను మేయర్, కమిషనర్ ఆదేశించారు. యాక్షన్ టీమ్ లను అందుబాటులో ఉంచారు.

రంగారెడ్డి జిల్లాలో వర్షం కారణంగా ఎనిమిది మంది గల్లంతయ్యారు. తాండూరు-కోట్ పల్లి రహదారి మధ్యలో వెంకటాపూర్ వాగు భీకరంగా పొంగడంతో ఓ కారు కొట్టుకుపోయింది. అందులో ఆరుగురు వ్యక్తులు ఉన్నారు. వారి ఆచూకీ తెలియడం లేదు. మరో ఘటన ధారూరు మండలం రాళ్లచిట్టెంపల్లి వాగులు బైక్ పై ఉన్న ఇద్దరు కొట్టుకువెళ్లిపోయారు. వారి ఆచూకీ కూడా తెలియడం లేదు.