వరదనీటిలో తెలుగు రాష్ట్రాలు

పశ్చిమ మధ్య బంగాళాఖాతంలో ఏర్పడిన అల్పపీడన ప్రభావం తెలుగు రాష్ట్రాలపై భారీగా చూపిస్తోంది. రెండు రోజులుగా తెలంగాణ, ఆంధ్రప్రదేశ్ లలో భారీ వర్షాలు కురుస్తున్నాయి. నేడు, రేపు కూడా భారీ నుంచి అతి భారీ వర్షాలు పడే అవకాశం ఉన్నట్టు వాతావరణ కేంద్రం చెబుతోంది. మంగళవారం రాత్రి నుంచి మొదలైన వర్షం బుధవారం రాత్రి వరకు ఎక్కడో చోట పడుతూనే ఉంది. హైదరాబాద్ లో 155 కాలనీలు నీట మునిగాయి. 115 అపార్ట్ మెంట్ ల సెల్లార్ లోకి నీళ్లు భారీగా చేరి అపార్ట్ మెంట్ వాసులను తీవ్ర ఇబ్బందులకు గురించేసింది. మోటార్ల ద్వారా సెల్లార్లలోని నీటిని తోడేస్తున్నారు ప్రజలు. ఏడు ఫైరింజన్లు కూడా పలు అపార్ట మెంట్ ల దగ్గరి నీటిని తోడేస్తున్నాయి. దాదాపు ఈ వర్షాలకి రెండు వేల కార్లు, 6 వేల బైక్ లు దెబ్బతిన్నాయి. హైదరాబాద్ హకీం పేట రికార్డు స్థాయిలో 17 సెం.మీ వర్షం పడింది. తెలంగాణలోని మిగతా జిల్లాల్లో కూడా వర్షాలు పడుతూనే ఉన్నాయి.

ఆంధ్రప్రదేశ్ లో...
బుధవారం నుంచి భారీవర్షాలు ఏపీలోనూ నమోదవుతున్నాయి. విజయవాడ, గుంటూరు, ఉభయగోదావరి జిల్లాలు, ప్రకాశం, కర్నూలులో అనేక చోట్ల భారీ వర్షాలు పడ్డాయి. కర్నూలు జిల్లా మహానందిలో భారీ వర్షపాతం నమోదైంది. పాలేరు వాగు పొంగిపొర్లుతోంది. ఎన్జీరంగా యూనివర్సిటీ పూర్తి జలదిగ్భంధంలో చిక్కుకుంది. విజయవాడలోనూ భారీ వర్షం పడింది. చాలా ప్రాంతాలు ప్రాంతాలు జలమయం అయ్యాయి. ఇక గుంటూరులో వర్షం బీభత్సాన్ని సృష్టించింది. గుంటూరు నుంచి ఇతర ప్రాంతాలకు రవాణా సౌకర్యం నిలిచిపోయింది.