తెలుగురాష్ట్రాల్లో 72గంటల్లో వానలే వానలు

గగనతలంలో విస్తారంగా వ్యాపించిన క్యుములోనింబస్ మేఘాల వల్ల తెలుగు రాష్ట్రాలు తడిసి ముద్దవబోతున్నాయి. వచ్చే 72 గంటల్లో ఆంధ్ర, తెలంగాణ రాష్ట్రాల్లో భారీ వర్షాలు కురిసే అవకాశం ఉంది. కోస్తా ఆంధ్ర జిల్లాలు, రాయలసీమ జిల్లాల్లోని కొన్ని ప్రాంతాల్లో ఉరుములు, మెరుపులతో కూడిన వడగళ్ల వానలు కురుస్తాయని హైదరాబాదులోని వాతావరణ కేంద్రం చెప్పింది. ఉత్తరాంధ్ర జిల్లాల్లో కూడా మోస్తరు నుండి భారీ వర్షాలు కురియవచ్చు. ఇక తెలంగాణలో చూస్తే, ఆదిలాబాద్, కరీంనగర్, వరంగల్, నల్గొండ, ఖమ్మం, మహబూబ్ నగర్ జిల్లాల్లో భారీవర్షాలు కురిసే అవకాశం ఉంది. తెలంగాణ రాష్ట్ర వ్యాప్తంగా వర్షాలు పెద్ద ఎత్తున కురియనున్నందున ప్రజలు అప్రమత్తంగా ఉండాలని సూచించింది.