మన నోట్లో ‘మట్టి’గొడుతున్న కర్ణాటక!

కర్ణాటక రాష్ట్రం ఆలమట్టి డ్యాం నిండా నీటిని ఒడిసిపట్టుకుంటూ.. తెలుగు రాష్ట్రాల నోట్లో మట్టిగొడుతోంది. ఎగువన కురుస్తున్న వర్షాలతో ప్రాజెక్టులోకి భారీ మొత్తంలో నీరు చేరుతున్నా కిందకి విడుదల చేయడం లేదు. ఎత్తి పోతల పథకాల ద్వారా ఆ రాష్ట్రం వచ్చిన నీటిని వచ్చినట్లే పలు ప్రాజెక్టులకు తరలిస్తోంది. దీంతో చుక్క నీరు కూడా కిందికి రావడం లేదు. మరోవైపు మన శ్రీశైలం డ్యాంలో నీళ్లు అడుగంటాయి. కనీసం తాగడానికైనా కొన్ని నీళ్లను వదలమంటూ వేడుకున్నా.. ఆ రాష్ట్రం కనికరించడం లేదు.‌ ఈ విషయంలో ఉన్న న్యాయపరమైన అంశాల్ని తెలుగు రాష్ట్రాలు పరిశీలిస్తున్నాయి.

నాగార్జునసాగర్‌ నుంచి తాగునీటికి ఇబ్బంది అవుతోందని, కనీసం తాగడానికైనా కొంత నీటిని విడుదల చేయాలంటూ తెలంగాణ నీటి పారుదల శాఖ మంత్రి హరీష్‌రావు కర్ణాటక ప్రభుత్వానికి లేఖ రాశారు. దీనిపై ఆలోచిస్తామంటూ.. ఆ రాష్ట్ర నీటి పారుదల శాఖ మంత్రి నిర్లక్ష్యంగా సమాధానం ఇచ్చారు.

ఇది కేవలం ఇప్పటి సమస్య కాదు.. ఏటా ఇలాగే జరుగుతోంది. భవిష్యత్తులో ఈ సమస్య మరింత తీవ్రం కానుంది. సాగుకు అటుంచి తాగు నీటికి కూడా ఇబ్బందులు తలెత్తే అవకాశం ఉంది. ఈ పరిస్థితి నుంచి బయటపడటానికి ఏం చేయాలని తెలుగు రాష్ట్రాల నీటి పారుదల శాఖ అధికారులు తర్జనభర్జన పడుతున్నారు.

కర్ణాటకలో ఆలమట్టి, నారాయణపూర్‌ రిజర్వాయర్లు రెండూ నిండాయి. ఇన్‌ఫ్లో 1000 క్యూసెక్కులు ఉండగా.. 6000 క్యూసెక్కుల నీటిని కాలువలకు వదులుతున్నారు. ఆ రాష్ట్ర ఉద్దేశమేమిటో ఈ ఉదంతోనే అర్థమవుతోంది. ఆగస్టు రెండో వారం పూర్తవుతున్నా.. శ్రీశైలానికి చుక్క నీరు రాలేదు. ఈ నేపథ్యంలో ఏం చేయాలన్న దానిపై రెండు రాష్ట్రాల నీటిపారుదల శాఖ అధికారులు సమాలోచనలు జరుపుతున్నారు.