మేడారానికి హెలికాప్టర్ సేవలు.. జాతరకు ఉప రాష్ట్రపతి

మేడారం సమ్మక్క-సారలమ్మ జాతరకు హైదరాబాద్ నుంచి హెలికాప్టర్ సౌకర్యం అందుబాటులోకి వస్తోంది. ఈ మేరకు రాష్ట్ర దేవాదాయ శాఖ మంత్రి అల్లోల ఇంద్రకరణ్‌ రెడ్డి పేర్కొన్నారు. బుధవారం (జనవరి 3) ఆయన ఢిల్లీలో ఉప రాష్ట్రపతి వెంకయ్యనాయుడిని కలిశారు. మేడారం జాతరను ‘జాతీయ పండుగ’గా ప్రకటించాలని ఉప రాష్ట్రపతిని కోరారు. ఈ సందర్భంగా వెంకయ్యనాయుడు.. తాను కూడా జాతరకు హాజరవుతానని చెప్పినట్లు ఇంద్రకరణ్ రెడ్డి తెలిపారు. అనంతరం మీడియాతో మాట్లాడిన మంత్రి.. జాతరకు ప్రభుత్వం నుంచి రూ. 80 కోట్లు కేటాయించినట్లు తెలిపారు.

జనవరి 21 నుంచి ప్రారంభం కానున్న మేడారం జాతరకు వివిధ రాష్ట్రాల నుంచి కోటి మందికి పైగా భక్తులు వస్తారని అంచనా వేస్తున్నారు. దేశవ్యాప్తంగా మేడారం జాతరకు ప్రచారం కల్పిస్తున్నట్లు మంత్రి ఇంద్రకరణ్ రెడ్డి తెలిపారు. మేడారంలో ప్రత్యేక హెలిప్యాడ్ ఏర్పాటు చేస్తున్నామని, హైదరాబాద్ నుంచి హెలికాప్టర్ సౌకర్యం కల్పిస్తున్నామని ఆయన తెలిపారు.

కేంద్ర గిరిజన శాఖ మంత్రిని కూడా కలిసి మేడారం జాతరను జాతీయ పండుగగా గుర్తించాలని కోరినట్లు ఇంద్రకరణ్ రెడ్డి చెప్పారు. తెలంగాణ ఏర్పడిన తర్వాత రాష్ట్ర ప్రభుత్వం ‘సమ్మక్క - సారలమ్మ’ జాతరను ఘనంగా నిర్వహిస్తున్న విషయం తెలిసిందే.