పంచాయతీల్లో ప్రత్యేక అధికారుల పాలన రాజ్యాంగ విరుద్ధం: హైకోర్టు

తెలంగాణలోని పంచాయతీల్లో ప్రత్యేక అధికారుల పాలనపై హైకోర్టు సీరియస్‌గా స్పందించింది. ప్రత్యేక అధికారుల్ని నియమించడం రాజ్యాంగ విరుద్ధమని స్పష్టం చేసింది. గురువారం పంచాయతీ ఎన్నికల నిర్వహణపై కోర్టులో జరిగిన విచారణ సందర్భంగా పలు కీలక వ్యాఖ్యలు చేసింది. ఎన్నికలు నిర్వహించేందుకు ప్రభుత్వం సరైన చర్యలు తీసుకోలేదని ధర్మాసనం అసంతృప్తి వ్యక్తం చేసింది. గురువారం నుంచి మూడు నెలల వరకు మాత్రమే ప్రత్యేక అధికారుల పాలన కొనసాగించాలంది.

మూడు నెలల్లో పంచాయతీ ఎన్నికలు నిర్వహించాలని ధర్మాసనం ఆదేశించింది. ఎన్నికల నిర్వహణకు సంబందించిన ఏర్పాట్లను ఆలోపే పూర్తి చేయాలంది. ఎన్నికల సంఘం కూడా చర్యలు తీసుకోవాలని సూచించింది హైకోర్టు. తెలంగాణలో జులై 31తో పంచాయతీల గడువు ముగియగా.. ఆగస్టు 1 నుంచి ప్రత్యేక అధికారుల పాలన కొనసాగుతోంది. దీన్ని సవాల్ చేస్తూ కొందరు హైకోర్టులో పిటిషన్లు దాఖలు చేశారు. వీటిపై విచారణ జరిపిన కోర్టు.. అధికారుల పాలనను తప్పుబట్టింది.