బాలయ్య పీఏ వివాదం.. హిందూపురంలో 144 సెక్షన్

ప్రముఖ సినీ నటుడు బాలకృష్ణ ఎమ్మెల్యేగా ప్రాతినిధ్యం వహిస్తోన్న హిందూపురంలో 144 సెక్షన్ విధించారు. బాలయ్య పీఏ శేఖర్‌పై వచ్చిన ఆరోపణలు, తదనంతర పరిణామాల నేపథ్యంలో పోలీసులు 144 సెక్షన్ విధించారు. శేఖర్ వర్గీయులు, వైరి వర్గీయుల మధ్య పోరు నానాటికీ తీవ్రం అవుతుండటంతో నిరసనలు, సమావేశాలు చేపట్టకుండా పోలీసులు హిందూపురం పట్టణంలో 144 సెక్షన్ విధించారు. కొందరు నేతలతో వెళ్లొద్దంటూ బాలయ్య పీఏ శేఖర్‌ కార్యకర్తలకు హుకుం జారీ చేశాడు. ఇది స్థానిక సీనియర్లలో ఆగ్రహానికి కారణమైంది. శేఖర్ తీరుకు నిరసనగా.. గత కొద్ది రోజులుగా టీడీపీ నాయకులు కొందరు సమావేశాలు, నిరసనలు చేపడుతున్నారు. పోటీగా శేఖర్ వర్గీయులు కూడా ప్రదర్శనలు చేపట్టడంతో వివాదం ముదిరి పాకానపడింది.

శేఖర్‌ వ్యవహార శైలికి నిరసనగా రాజీనామా చేస్తున్నామని ఇద్దరు జడ్పీటీసీలు ప్రకటించారు. శేఖర్ వర్గానికి చెందిన వ్యక్తులతోపాటు అతడి వ్యతిరేక వర్గీయులు నిరసన ప్రదర్శనలకు దిగే వీలు ఉండటంతో పోలీసులు 30 యాక్ట్ విధించారు. హిందూపురం పట్టణంలో సమావేశాలు, నిరసనలు చేపట్టవద్దని ఆదేశాలు జారీ చేశారు.

మాజీ ఎమ్మెల్యే సీసీ వెంకటరాముడు, అంబికా లక్ష్మీనారాయణ తదితరులు శేఖర్‌ తీరుపై తీవ్ర ఆగ్రహంతో ఉన్నట్లు తెలుస్తోంది. శేఖర్‌ దూకుడు కారణంగా పార్టీకి నష్టం వాటిల్లే ప్రమాదం ఉందని వారు హెచ్చరిస్తున్నారు. శేఖర్‌ను బాలయ్య ఇంట్లోనే గృహ నిర్భందంలో ఉంచినట్లు సమాచారం. శేఖర్ వ్యవహరంలో సీఎం చంద్రబాబు జోక్యం చేసుకుంటారని, రెండు మూడ్రోజుల్లో సమస్యను పరిష్కరిస్తారని శేఖర్ వ్యతిరేక వర్గీయులు చెబుతున్నారు.