పాము కాటు, తీసుకోవాల్సిన జాగ్రత్తలు: స్నేక్ సేవియర్ క్రాంతి ఇంటర్వ్యూ

ఇటీవలి కాలంలో కృష్ణా జిల్లా అవనిగడ్డ ప్రాంతాన్ని పాముల బెడద వణికించింది. కొద్ది రోజుల వ్యవధిలోనే వందలాది మంది పాము కాటుకు గురై ఆసుపత్రి పాలయ్యారు. ఈ ఘటనలో ఇద్దరు యువకులు ప్రాణాలు కోల్పోయారు. పాము కాటు కారణంగా తెలుగు రాష్ట్రాల్లో మరణాల సంఖ్య గణనీయంగానే ఉంటోంది. దీంతో పాము కాటుకు గురైనప్పుడు ఏం చేయాలి? మనల్ని కరిచింది విష సర్పమా కాదా? అని గుర్తించడం ఎలా? పాము కాటు బారిన పడకుండా ఎలాంటి జాగ్రత్తలు తీసుకోవాలి? పాములు ఇంట్లో ప్రవేశించినప్పుడు ఏం చేయాలి? లాంటి విషయాలను స్నేక్ సేవియర్ సొసైటీ అధ్యక్షుడు చదలవాడ క్రాంతి ‘సమయం’తో పంచుకున్నారు.

పశ్చిమ గోదావరి జిల్లా జంగారెడ్డి గూడెంకి చెందిన క్రాంతి.. చాలా ఏళ్లుగా పాములను రక్షిస్తున్నారు. ఇళ్లలో ప్రవేశించిన పాములను ఒడుపుగా పట్టుకొని .. వాటిని సమీపంలోని అడవుల్లో వదిలేస్తున్నారు. ఇలా ఇప్పటి వరకూ పదివేలకుపైగా పాములను పట్టారీయన. స్నేక్ క్యాచర్‌గా కేరళలో శిక్షణ పొంది వచ్చిన క్రాంతి పాములను పట్టడంలో ఇతరులకు కూడా శిక్షణ ఇస్తున్నారు. పాము కాట్లపై జంగారెడ్డి గూడెం పరిసర ప్రాంత ప్రజలకు అవగాహన కల్పిస్తున్నారు. ఈయన కృషి వల్ల ఈ ప్రాంతంలో పాము కాటు మరణాలు చాలా
వరకు తగ్గాయి. ఆంధ్రప్రదేశ్‌ను పాము కాటు రహిత రాష్ట్రంగా మార్చడమే ధ్యేయంగా పెట్టుకున్న క్రాంతితో ‘సమయం’ ప్రత్యేక ఇంటర్వ్యూ మీకోసం..