రాజకీయాల్లో అనుభవం తక్కువే...:లోకేష్

తనకు రాజకీయ అనుభవం తక్కువేనని అన్నారు నారా లోకేష్. ఏపీ ముఖ్యమంత్రి చంద్రబాబు కొడుకైన ఆయన ఎమ్మెల్సీ అభ్యర్థిగా సోమవారం మధ్యాహ్నం నామినేషన్ దాఖలు చేశారు. ఎమ్మెల్యే కోటాలో ఆయనకు సీఎం చంద్రబాబు అవకాశమిచ్చారు. నామినేషన్ వేశాక ఆయన మీడియాతో మాట్లాడారు. తాను అయిదేళ్లుగా పార్టీలో కార్యకర్తగా పనిచేస్తున్నానని, తాను ఇక్కడికి వరకు రావడానికి కార్యకర్తలే కారణమని అన్నారు. అతి తక్కువ కాలంలోనే తనకు ఈ అవకాశం దక్కడం చాలా ఆనందంగా ఉందన్నారు. ఎమ్మెల్సీని పదవిగా కాకుండా బాధ్యతగా తీసుకుంటానని చెప్పారు.
పార్టీ ఆదేశాల మేరకే తాను ఎమ్మెల్సీ పదవికి పోటీ చేస్తున్నట్టు చెప్పారు. భవిష్యత్తులో ప్రజలకు, ప్రభుత్వానికి అనుసంధాన కర్తగా వ్యవహరిస్తానని చెప్పారు. అసెంబ్లీ కార్యదర్శికి ఆయన నామినేషన్ పత్రాలు అందజేశారు. ఆయన వెంట చీఫ్ విప్ కాల్వ శ్రీనివాసులు, పార్టీ రాష్ట్ర అధ్యక్షుడు కళా వెంకట్రావు, ఎమ్మెల్యేలు ఉన్నారు. ఆయన అభ్యర్థిత్వాన్ని పలువురు ఎమ్మెల్యేలు బలపరిచారు.