Hyderabad Metro: నేడే ఎల్బీనగర్ - అమీర్‌పేట్ మెట్రోకు పచ్చజెండా.. ప్రారంభించనున్న గవర్నరు నరసింహన్

హైదరాబాద్ వాసులకు గుడ్‌న్యూస్. నిత్యం రద్దీగా ఉండే మియాపూర్‌-ఎల్‌బీనగర్‌ (కారిడార్‌-1) మార్గంలో సోమవారం (సెప్టెంబరు 24) నుంచి మెట్రోరైలు సేవలు అందుబాటులోకి రానున్నాయి. ఈ మేరకు రాష్ట్ర గవర్నర్‌ నరసింహన్‌ సోమవారం మధ్యాహ్నం 12.15 గంటలకు అమీర్‌పేట్ స్టేషన్‌లో జెండా ఊపి ప్రారంభించనున్నారు. దీంతో అమీర్‌పేట్ నుంచి ఎల్‌బీనగర్‌ వరకు 16 కి.మీ. మార్గంలో మెట్రో సేవలు అందుబాటులోకి రానున్నాయి. ఈ కార్యక్రమానికి మంత్రి కేటీఆర్, మెట్రో అధికారులు హజరుకానున్నారు.

మెట్రో ప్రారంభం అనంతరం వీరంతా గవర్నర్‌తో కలిసి అమీర్‌పేట్ నుంచి ఎల్‌బీనగర్‌ మెట్రోలో ప్రయాణించనున్నారు. సాయంత్రం 6 గంటల తర్వాత ప్రయాణికులను ఈ మార్గంలో అనుమతిస్తారు. మెట్రోరైలు కారిడార్‌-1లోని కొంత దూరం మియాపూర్‌ నుంచి అమీర్‌పేట్, కారిడార్‌-2లోని నాగోల్‌ నుంచి అమీర్‌పేట్ వరకు 30 కి.మీ. మార్గాన్ని ప్రధాని మోదీ, సీఎం కేసీఆర్‌ గత ఏడాది నవంబరు 28న ప్రారంభించిన సంగతి తెలిసిందే.

Also Read: Governor Narasimhan Flags Off Ameerpet to LB Nagar Metro Line

ఢిల్లీ తర్వాత హైదరబాద్..
మెట్రో కారిడార్-1లోని 29 కిలోమీటర్ల పూర్తి మార్గం ప్రజలకు అందుబాటులోకి రానుంది. ఇప్పటికే నాగోల్ నుంచి అమీర్‌పేట్, అక్కడి నుంచి మియాపూర్ దాకా 30 కిలోమీటర్ల మేర మెట్రో రైలు సేవలందుతున్న సంగతి తెలిసిందే. కారిడార్-1 అందుబాటులోకి రావడంతో ఎల్బీనగర్ నుంచి అమీర్‌పేట్ వరకు 16 కిలోమీటర్ల మేర అందుబాటులోకి వస్తుండటంతో నగరంలో మెట్రో ప్రయాణం మొత్తం 46 కిలోమీటర్లకు విస్తరించనుంది. దీంతో దేశంలో ఢిల్లీ తర్వాత అతి పొడవైన మెట్రోగా హైదరాబాద్ మెట్రో రికార్డు నెలకొల్పనుంది. దేశంలో ఢిల్లీలో మాత్రమే 252 కిలోమీటర్ల దూరం మెట్రో సేవలు అందిస్తుండగా, తర్వాత స్థానంలో చెన్నై 35.3 కి.మీ. మేర సేవలందిస్తోంది.

త్వరలో మెట్రో కారిడార్-3 సేవలు..
మరో శుభవార్త ఏంటంటే.. అతి త్వరలోనే 8.5 కిలోమీటర్ల అమీర్‌పేట్ - శిల్పారామం మార్గం(కారిడార్-3)లో సేవలు ప్రారంభించేందుకు మెట్రో అధికారులు సన్నాహాలు చేస్తున్నారు.

Related Article: ఎల్‌బీనగర్ మార్గంతో రెండో అతిపెద్ద వ్యవస్థగా హైదరాబాద్ మెట్రో