మియాపూర్: పావుగంటలో రెండు చోట్ల చైన్ స్నాచింగ్

భాగ్యనగరంలో చైన్ స్నాచర్లు రెచ్చిపోతున్నారు. తాజాగా మియాపూర్‌లో ఓ చైన్ స్నాచర్ పావు గంట వ్యవధిలో రెండుచోట్ల మహిళల మెడలోంచి బంగారం లాక్కొని ఉడాయించాడు. వెంకటరమణ కాలనీ గోకుల్ ప్లాట్స్ వద్ద బుధవారం (జనవరి 10) రాత్రి 7.45 గంటల సమయంలో బైక్‌పై వచ్చిన ఓ దుండగుడు మహిళ మెడలోంచి 5 తులాల పుస్తెల తాడును అపహరించుకుపోయాడు. 8 గంటల సమయంలో అదే దుండగుడు వసంత్‌నగర్‌లో మరో మహిళ మెడలోంచి పుస్తెల తాడును లాక్కొని వెళ్లిపోయాడు.

దుండగుడు బ్లాక్ అండ్ వైట్ చెక్స్ షర్ట్ ధరించి ఉన్నాడని, హెల్మెట్ పెట్టుకోలేదని బాధిత మహిళలు పోలీసులకు తెలిపారు. వసంత్‌నగర్‌లో ఓ ఇంటి ముందు నిల్చొని ఉన్న మహిళ వద్ద బైక్ ఆపిన దుండగుడు.. ‘ఆంటీ.. ఈ ముగ్గు ఎవరేశారూ’ అంటూ ప్రశ్నించాడు. ఆమె సమాధానం చెప్పేలోపే పుస్తెల తాడు లాక్కొని ఉడాయించాడు.

కేసు నమోదు చేసుకున్న పోలీసులు సీసీటీవీ ఫుటేజీల ఆధారంగా దుండగుణ్ని గుర్తించే ప్రయత్నం చేస్తున్నారు. వెలుతురు సరిగా లేనందువల్ల ఫుటేజీల్లో నిందితుడి బైక్ నంబర్ సరిగా కనిపించడం లేదు. దుండగుడు మియాపూర్ ఆల్వే జంక్షన్ నుంచి కేపీహెచ్‌బీ దిశగా వెళ్లినట్లు ఫుటేజీల ద్వారా తెలుస్తోంది.