1000 పెళ్లిళ్ల ఖాజీపై రౌడీషీట్

బాధ్యత కలిగిన ఖాజీ స్థానంలో ఉంటూ బ్రోకర్‌గా మారాడు. అరబ్ షేక్‌లకు అన్నీ తానై అబసుబం తెలియని బాలికలతో కాంట్రాక్టు పెళ్లిళ్లు జరిపించాడు. ఇలా ఒకటి కాదు, రెండు కాదు.. ఏకంగా 1000కి పైగా పెళ్లిళ్లు దగ్గరుండి జరిపించాడు. అతనే హైదరాబాద్ పాతబస్తీకి చెందిన గ్రేటర్ చీఫ్ ఖాజీ రఫియా. ఇతను వివాహ ధ్రువపత్రం జారీచేసే ఖాజీ మాత్రమే కాదని, షేక్‌లకు అన్నీ తానై అక్రమ పెళ్లిళ్లు జరిపించే ప్రధాన ఏజెంట్ అని పోలీసులు విచారణలో తేలింది. కాంట్రాక్ట్ పెళ్లిళ్ల వ్యాపారం మూడు పూవులు, ఆరు కాయలుగా దూసుకెళ్తుండటంతో హైదరాబాద్‌లోనే కాకుండా ముంబైలోనూ ఇతను కార్యాలయం తెరిచినట్లు పోలీసులు గుర్తించారు.

పాతబస్తీలోని బాలికలకు డబ్బు ఆశచూపి అరబ్ షేక్‌లతో వివాహం జరిపిస్తున్న గ్రేటర్ చీఫ్ ఖాజీ అలీ అబ్దుల్లా రఫియాను సౌత్‌జోన్ పోలీసులు మంగళవారం అరెస్టు చేసిన సంగతి తెలిసిందే. ఈ కేసును సీరియస్‌గా తీసుకున్న పోలీసులు లోతుగా దర్యాప్తు చేస్తున్నారు. గడిచిన ఐదేళ్లలో రఫియా జరిపించిన వెయ్యికి పైగా పెళ్లిళ్లలో అసలు పెళ్లిళ్లు ఎన్ని.. కాంట్రాక్ట్ పెళ్లిళ్లు ఎన్ని అనే విషయాలను తేల్చేందుకు పోలీసులు విచారణ ప్రారంభించారు. రఫియా గుట్టంతా ముంబై కార్యాలయంలో ఉన్న రికార్డుల్లో దాగి ఉందని భావిస్తున్నారు. అందుకే అతన్ని ముంబైకి తీసుకెళ్లి పెళ్లిళ్ల రికార్డులు తనిఖీ చేయనున్నారు. పాతబస్తీ బాలికలతో అక్రమ పెళ్లిళ్ల కోసం అరబ్ షేక్‌ల నుంచి రఫియా రూ. 5 లక్షలు తీసుకునేవాడు. దీనిలో బాలిక కుటుంబ సభ్యులకు రూ.70వేలు, బాలికలను వలవేసే ఏజెంట్లకు రూ.2.50 లక్షలు ఇచ్చేవాడు. మిగిలినది ఇతని ఖాతాలోకి వెళ్తుంది.

కాగా, ఈ కేసులో రఫియాతో పాటు మరో నలుగురు ఖాజీలను పోలీసులు అరెస్టు చేశారు. అందరిపై ఆయా పోలీస్ స్టేషన్లలో రౌడీషీట్‌లు తెరిచారు. మతపరమైన బాధ్యతలో ఉన్న ఖాజీలపై రౌడీషీట్‌లు తెరవడం ఇప్పుడు పాతబస్తీలో సంచలనంగా మారింది. అలీ అబ్దుల్లా రఫియాపై భవనీనగర్ పోలీస్ స్టేషన్‌లో రౌడీషీట్ తెరిచారు. మరో ఖాజీ సయ్యద్ ముక్తదీర్‌పై ఫలక్‌నుమా పీఎస్‌లో, అజ్మతుల్లా, సయ్యద్ సల్మాన్‌పై కంచన్‌బాగ్ పీఎస్‌లో, మహ్మద్ నసీరుద్దీన్‌పై కామాటిపుర పీఎస్‌లో రౌడీషీట్‌లు ఓపెన్ చేశారు. వీరంతా పాతబస్తీలోని పేద ముస్లిం కుటుంబాలకు చెందిన బాలికలను టార్గెట్ చేసుకుని, వారికి డబ్బు ఆశచూపి అరబ్ షేక్‌లతో అక్రమ పెళ్లిళ్లు జరిపిస్తున్నారు.