వివాహితతో పోలీస్ అక్రమసంబంధం.. అడ్డంగా దొరికి గన్‌తో బెదరింపులు!

పెడదోవలో పట్టినవారిని సక్రమ మార్గంలో నడిపించాల్సిన పోలీసే దారి తప్పాడు. వివాహితతో అక్రమ సంబంధం పెట్టుకున్న అదనపు డీసీపీ గన్‌మెన్, అడ్డంగా దొరికిపోయి ఆమె భర్తను బెదిరించాడు. దీంతో అతడిపై సదరు భర్త ఫిర్యాదు చేయడంతో కమిషనర్ అతడిని విధుల నుంచి తప్పించారు. వివరాల్లోకి వెళితే అడిషనల్ డీసీపీకి భద్రతగా విధులు నిర్వహించే మెయినాబాద్‌కు చెందిన చాకలి రమేశ్ (26) అదే గ్రామంలోని ఓ మహిళతో వివాహేతర సంబంధం పెట్టుకున్నాడు. గత సోమవారం విధుల్లో ఉన్న రమేష్, తన సర్వీస్ రివాల్వర్‌తో సహా ఆమె ఇంటికి వెళ్లాడు. వివాహితతో ఉన్న సమయంలో ఆమె భర్త రాజు ఇంటికి వచ్చాడు. గన్‌మెన్ రమేశ్‌‌తో తన భార్యను అలా చూసిన రాజు తీవ్ర ఆగ్రహం వ్యక్తం చేశాడు.

దీంతో తన చేతిలోని రివాల్వర్ చూపించి బెదిరించాడు. రమేష్ అలా బెదిరించేసరికి భయపడిన రాజు కేకలు వేయడంతో చుట్టుపక్కల ఉన్నవారు అక్కడకు చేరుకున్నారు. నిందితుడు రమేష్‌కు దేహశుద్ధి చేసి పోలీసులకు ఫిర్యాదు చేశారు. తనను హత్య చేయడానికి రమేష్ ప్రయత్నించాడని బాధితుడు రాజు తన ఫిర్యాదులో పేర్కొన్నాడు. దీంతో మోయినాబాద్ పోలీసులు కేసు నమోదు చేసి, నిందితుడిని అదుపులోకి తీసుకుని న్యాయస్థానంలో ప్రవేశపెట్టారు. ఈ విషయం రాచకొండ కమిషనర్ మహేశ్ భగవత్‌కు తెలియడంతో అతణ్ని విధులు నుంచి తప్పించారు. రమేశ్‌కు న్యాయస్థానం రిమాండ్ విధించింది. శాంతిభద్రతలను పరిరక్షించాల్సిన పోలీసులే ఇలా వ్యవహరించడంతో విమర్శలు వెల్లువెత్తుతున్నాయి. ఇటీవల కాలంలో ఇలాంటి ఘటన తరచూ చోటచేసుకోవడం ఉన్నతాధికారులు తీవ్రంగా స్పందిస్తున్నారు.