డ్రగ్స్ కేసులో మా పార్టీ నేతలైనా, మంత్రులైనా వదలకండి!

డ్రగ్స్ వ్యవహారంలో టీఆర్ఎస్ నాయకులైనా, మంత్రులైనా సరే వదిలిపెట్టవద్దని, చట్ట వ్యతిరేక కార్యకలాపాలకు పాల్పడితే ఎవరినీ ఉపేక్షించవద్దని చర్యలు తీసుకోవాలని తెలంగాణ ముఖ్యమంత్రి కేసీఆర్ ఆదేశించారు. ప్రగతిభవన్‌లో ఎక్సైజ్, పోలీసు అధికారులతో కేసీఆర్ సమావేశం అయ్యారు. సుమారు మూడు గంటలపాటు సాగిన ఈ భేటీలో ప్రధానంగా డ్రగ్స్ దందా గురించి చర్చ జరిగింది. డ్రగ్స్ కేసు విచారణలో దూకుడు పెంచాలని, ఒకవేళ అధికార పార్టీకి చెందిన నాయకులు, మంత్రులకు ఈ వ్యవహారంతో సంబంధాలు ఉంటే తక్షణమే చర్యలు తీసుకోవాలని ఆయన ఆదేశాలు జారీచేశారు. హైదరాబాద్ నగరంలో డ్రగ్స్ వాడకం, దందాలు ఎప్పటి నుంచో ఉన్నాయని, దీనిని పూర్తిగా రూపుమాపడానికి అధికారులు కృషి చేయాలని అన్నారు. హైదరాబాద్‌ను డ్రగ్స్ రహిత నగరంగా మార్చి, బ్రాండ్ ఇమేజ్2ను కాపాడాలని కేసీఆర్ సూచించారు.

హైదరాబాద్‌లో డ్రగ్స్ అరాచకం అంతం కావాలనే ఉద్దేశంతో ఎక్సైజ్ శాఖ డైరెక్టర్ అకున్ సబర్వాల్‌ను సెలవు రద్దు చేసుకోమని తానే సూచించి, కేసు పూర్వాపరాలను వెలికితీయాలని ఆదేశించానని తెలిపారు. డ్రగ్స్, కల్తీలతో పాటు ఇతర సామాజిక సమస్యలకు సంబంధించిన అంశాలపై కేసీఆర్ సమీక్షించినట్టు సమాచారం. వస్తువుల కల్తీలు, రక్తం కల్తీ వ్యవహారంపై కేసీఆర్ ఆగ్రహం వ్యక్తం చేసినట్టు సంబంధిత వర్గాలు తెలియజేశాయి. అక్రమార్కులపై కఠినంగా వ్యవహరించాలని, హైదరాబాద్‌లో డ్రగ్స్ సరఫరా చేయాలంటే భయపడేలా చర్యలు తీసుకోవాలని అధికారులను కేసీఆర్ ఆదేశించారు.

డ్రగ్స్ దందాపై విచారణలో భాగంగా ప్రధాన నిందితుడు కెల్విన్ గంటకో కొత్త పేరు చెబుతుంటే సిట్ అధికారులు విస్తుపోతున్నారు. అతడి మొబైల్‌లో ఉన్న పలువురు రాజకీయ నేతల పిల్లలకూ నోటీసులు ఇచ్చి విచారించాలని సిట్ భావిస్తోంది. దీంతో ఈ కేసులో తమ పిల్లల పేర్లు ఎక్కడ బయటకు వస్తాయోనన్న ఆందోళనతో చాలా మంది రాజకీయ నాయకులు ఎక్సైజ్ పోలీసులపై ఒత్తిడికి తమ వంతు ప్రయత్నాలు ప్రారంభించారట. ఇదే విషయాన్ని సీఎం వద్ద ఎక్సైజ్ ఈడీ అకున్ సబర్వాల్ ప్రస్తావించగా ధైర్యంగా ముందుకు సాగాలని ఆయన సూచించారు.