హాయ్ మెసేజ్‌తో.. గృహిణి జీవితం కల్లోలం..!

అపరిచిత నెంబరు నుంచి వచ్చిన ‘హాయ్’ మెసేజ్‌ ఓ గృహిణి జీవితంలో కల్లోలం రేపింది. తియ్యని మాటలతో ఆమెని లొంగదీసుకున్న నిందితుడు అత్యాచారం చేయడంతో పాటు పలుమార్లు బెదిరించి దాదాపు రూ.55 వేలు, 5 గ్రాముల బంగారును దోచుకెళ్లాడు. అయినప్పటికీ.. అతని వేధింపులు ఆగకపోవడంతో.. ఎట్టకేలకి బాధితురాలు ధైర్యం చేసి భర్తకి అసలు విషయం చెప్పడంతో.. వారిద్దరూ మీర్‌పేట పోలీసులకి ఫిర్యాదు చేశారు. వనస్థలిపురం ఏసీపీ రవీందర్ రెడ్డి ఆధ్వర్యంలో విచారణ ప్రారంభించిన మీర్‌పేట పోలీసులు నిందితుడ్ని అరెస్టు చేశారు.

ఎల్‌బీ నగర్ డీసీపీ వెంకటేశ్వరరావు చెప్పిన కథనం ప్రకారం.. హైదరాబాద్‌లోని ఓల్డ్ మలక్‌పేటకి చెందిన పవన్ కుమార్ డీజే ఆపరేటర్‌గా పనిచేస్తున్నాడు. ఇటీవల అతను తనకు తోచిన నంబర్లకి వాట్సాప్‌ ద్వారా హాయ్ అని మెసేజ్ పెట్టగా.. అవతలివైపు ఒక నంబరు నుంచి ‘ఎవరు..?’ అని ప్రశ్నించడంతో.. సారీ.. రాంగ్ నంబరు అంటూ సమాధానమిచ్చాడు. ఆ తర్వాత మీరెవరు..? అని ప్రశ్నించి.. అవతలివైపు ఉన్నది గృహిణి అని తెలియడంతో తియ్యగా మాటలు కలిపాడు.

ఆ రోజు మొదలు.. ప్రతిరోజు గుడ్ మార్నింగ్ అంటూ మొదలెట్టి క్షేమ సమాచారాలు తెలుసుకుంటూ.. ఆమెకి దగ్గరయ్యాడు. ఆమె కూడా రిప్లై ఇస్తూ ఉండటంతో.. వీరిద్దరి మధ్య స్నేహం చిగురించింది. ఈ క్రమంలోనే గృహిణి‌పై ప్రేమ నటించిన పవన్ కుమార్ ఇటీవల ఆమె భర్త ఇంట్లోలేడని తెలుసుకుని వాళ్లింటికి వెళ్లాడు. అక్కడ ఆమెని బెదిరించి అత్యాచారానికి ఒడిగట్టాడు. అనంతరం విషయం భర్తకి చెప్తానంటూ పలుమార్లు బెదిరించి అత్యాచారానికి పాల్పడిన పవన్ కుమార్.. ఆమె నుంచి డబ్బు, నగలు కాజేశాడు. అయితే.. అతని వేధింపులు మరీ తీవ్రతరం కావడంతో.. బాధితురాలు భర్తకి అసలు విషయం చెప్పి.. పోలీసుల్ని ఆశ్రయించింది. దీంతో నిందితుడు కటకటాల పాలయ్యాడు.