కొడుకును ఆటోకేసి కొట్టిన ఘటన.. కసాయి తండ్రి అరెస్ట్

కుటుంబ కలహాలతో కన్న కొడుకునే ఆటోకేసి బాదిన తండ్రి పోలీసులకు దొరికిపోయాడు. రెండు రోజులుగా తప్పించుకొని తిరుగుతున్న శివ గౌడ్‌ను గురువారం అరెస్ట్ చేశారు. ఈ కేసులో స్థానిక సీఐ నిర్లక్ష్యంగా వ్యవహరించారని ఆరోపణలు కూడా రావడంతో.. స్పెషల్ టీమ్‌లను రంగంలోకి దించి మరి నిందితుడ్ని పట్టుకున్నట్లు తెలుస్తోంది. అతడిపై ఇప్పటికే ఐపీసీ 307, 77 జేజే యాక్ట్ కింద కేసులు నమోదు చేశారు. అతడ్ని కోర్టులో హాజరుపర్చి రిమాండ్‌కు తరలించారు. ఇటు తీవ్రంగా గాయపడిన పసివాడు శిశువిహార్‌లో కూడా మెల్లిగా కోలుకుంటున్నాడు. తల్లి కుమారుడ్ని తనకు అప్పగించాలని కోరినా అధికారులు నిరాకరించారు.

హైదరాబాద్ జగద్గిరిగుట్టలోని శ్రీనివాసనగర్‌ కాలనీకి చెందిన శివ గౌడ్ , అనూషలు ప్రేమించి పెళ్లి చేసుకొన్నారు. వారికి మూడేళ్ల కొడుకు కూడా ఉన్నాడు. అయితే శివకు మద్యం అలవాటు ఉంది.. అలాగే మరో మహిళతో కూడా వివాహేతర సంబంధం ఉంది. దీనిపై భార్యాభర్తల మధ్య తరచూ గొడవలు కూడా జరుగుతుండేవి. ఈ క్రమంలోనే అర్థరాత్రి సమయంలో మళ్లీ వాగ్వాదానికి దిగారు. కోపంతో శివ పిల్లాడిని ఇంట్లో నుంచి బయటకు తీసుకొచ్చాడు. కొడుకును ఆటోకేసి గట్టిగా కొట్టడంతో తీవ్రంగా గాయపడ్డాడు.