ప్రాణం తీసిన కత్తి విన్యాసం.. పెళ్లి బరాత్‌లో విషాదం

పెళ్లి ఊరేగింపులో విషాదం చోటు చేసుకుంది. కత్తులతో విన్యాసాలు చేసిన మైనర్లు.. ఓ మైనర్ బాలుడి ప్రాణాన్ని బలి తీసుకున్నారు. హైదరాబాద్‌లోని షేక్‌పేటలో 3 రోజుల కిందట చోటు చేసుకున్న ఈ విషాదం ఆలస్యంగా వెలుగులోకి వచ్చింది. షేక్‌పేటకు చెందిన సయ్యద్‌ హమీద్‌ స్థానిక పాఠశాలలో తొమ్మిదో తరగతి చదువుతున్నాడు. స్నేహితుల ఆహ్వానం మేరకు మూడు రోజుల కిందట అతడు ఓ పెళ్లి బరాత్‌కు వెళ్లి డాన్స్ చేశాడు.

ఊరేగింపులో వేడుకల్లో భాగంగా.. కొంత మంది మైనర్లు అనుభవం లేకున్నా తల్వార్లతో విన్యాసం (మర్ఫా డాన్స్‌) చేశారు. ఆ క్రమంలో ఓ కత్తి దూసుకొచ్చి హమీద్‌ మెడకు తగిలింది. తీవ్ర రక్తస్రావం కావడంతో అతడు అక్కడే కుప్పకూలిపోయాడు.

హమీద్‌ను హుటాహుటిన దారుసలాంలోని ఓ ఆసుపత్రికి తరలించారు. చికిత్స పొందుతూ ఆదివారం (జనవరి 7) అతడు ప్రాణాలు విడిచాడు. ఎదిగిన కొడుకు చనిపోవడంతో హమీద్ తల్లి కన్నీరుమున్నీరుగా విలపిస్తోంది. ఈ ఘటనకు సంబంధించి పోలీసులు 10 మందిని అదుపులోకి తీసుకున్నారు.