నాగోలు - ఎల్బీనగర్‌ మెట్రో రైలు లైన్‌ కలపరా..!

హైదరాబాద్ మెట్రో మలి దశ ప్రారంభంతో కీలక ముందడుగు వేసిన విషయం తెలిసిందే. తాజాగా ప్రారంభమైన అమీర్‌పేట - ఎల్‌బీనగర్ మార్గంతో నగరంలో మొత్తం 46 కి.మీ. మేర మెట్రో అందుబాటులోకి వచ్చింది. తద్వారా దేశంలో ఢిల్లీ తర్వాత అతి పొడవైన మెట్రో మార్గం ఉన్న నగరంగా భాగ్యనగరం గుర్తింపు సాధించింది. హైటెక్ సిటీ మార్గంలోనూ మెట్రో పనులు వడివడిగా పూర్తవుతున్నాయి. అయితే.. నాగోలు - ఎల్బీనగర్‌ మార్గం విషయంలో నగరవాసులకు కొత్త సందేహాలు మొదలయ్యాయి. ఈ మార్గంలో నేటికీ పనులు ప్రారంభించకపోవడంతో అసలు ఈ రెండింటినీ కలిపే ఉద్దేశం ఉందా? లేదా అనే అనుమానం మొదలైంది.

నాగోలు - ఎల్బీనగర్‌ మార్గంపై మెట్రో రైల్ ఎండీ ఎన్‌వీఎస్ రెడ్డి స్పష్టత ఇచ్చారు. నాగోలు నుంచి ఎల్బీనగర్‌ వరకు మెట్రోలైన్‌ను కలుపుతామని, ఆ పనులు త్వరలోనే వేగవంతమవుతాయని ఆయన చెప్పారు. మెట్రో ఫేజ్‌-1లో పాత బస్తీ మెట్రో మినహా మిగిలినవన్నీ ఈ ఏడాది చివరి వరకు పూర్తవుతాయని చెప్పారు.

రెండో దశ నిర్మాణంలో విమానాశ్రయానికి అన్ని వైపుల నుంచి మెట్రో కలపాలని సీఎం ఆదేశించినట్లు ఎన్‌వీఎస్ రెడ్డి తెలిపారు. రెండో దశకు సంబంధించి సర్వే జరుగుతోందని వివరించారు. ప్రజల అవసరాలకు అనుగుణంగా మెట్రో రైళ్ల సమయాలను మార్పు చేయనున్నట్లు చెప్పారు.

2000 పిల్లర్లు.. 8 చోట్ల ఆర్‌వోబీలు
సాధారణ ప్రయాణికుడి అవసరాలకు అనుగుణంగా మెట్రో నిర్మాణం చేపట్టామని ఎన్‌వీఎస్‌ రెడ్డి చెప్పారు. దాదాపు 2000 మెట్రో పిల్లర్లను నిర్మించామని తెలిపారు. సాంకేతిక పరిజ్ఞానాన్ని ఉపయోగించి 5 వేల మిలియన్‌ లీటర్ల నీటిని ఆదా చేశామని చెప్పారు.
ఇప్పటి వరకూ 46 కి.మీ మెట్రో ట్రాక్‌ పరిధిలో 8 ఆర్‌వోబీలు నిర్మించినట్లు మెట్రో రైల్‌ ఎండీ తెలిపారు. అత్యంత సంక్లిష్టతల మధ్య ఈ పని పూర్తి చేసినట్లు చెప్పారు. కొన్నిచోట్ల 60 నుంచి 70 అడుగుల ఎత్తున ట్రాక్‌ వేయాల్సి వచ్చిందని వివరించారు.

ఎల్‌బీ నగర్ మార్గంలో తొలి రోజే మంచి స్పందన కనిపించింది. అమీర్‌పేట నుంచి ఎల్‌బీనగర్‌ మార్గంలో సోమవారం (సెప్టెంబర్ 24) సాయంత్రం నుంచి ప్రయాణికులకు అనుమతించారు. రద్దీవేళల్లో ఆరున్నర నిమిషాలకు, ఆ తర్వాత 8 నిమిషాలకు ఒకటి చొప్పున రైళ్లను నడిపారు. రైళ్లన్నీ నిండుగా కనిపిస్తుండటంతో అధికారులు హర్షం వ్యక్తం చేస్తున్నారు.