అమీర్‌పేట మెట్రో స్టేషన్‌లో యువతికి వేధింపులు

హైదరాబాద్ మెట్రో స్టేషన్‌లో యువతిని వేధించడం కలకలంరేపింది. సికింద్రాబాద్‌కు చెందిన యువతి రసూల్‌పురా వెళ్లేందుకు జేఎన్టీయూ మెట్రో స్టేషన్‌లో రైలెక్కింది. అయితే అమీర్‌పేట ఇంటర్ ఛేంజ్ స్టేషన్‌లో దిగి రెండో ఫ్లోర్‌లో రైలు మారాల్సి ఉండటంతో... లిఫ్ట్ ఎక్కింది. తనకు ఎలా వెళ్లాలో అర్థంకాక... కిందికి దిగింది. అక్కడే ఉన్న సిబ్బందిని ఎటు వెళ్లాలో అడిగింది. అక్కడే ఉన్న టికెటింగ్ క్యాష్ మేనేజర్ నితిన్‌రెడ్డి లిఫ్ట్ ఎక్కమని చెప్పాడు. అతడు కూడా ఆమె వెంటే వెళ్లారు. లిఫ్ట్‌లో ఆమెతో అసభ్యంగా ప్రవర్తించి... వేధించాడు. ఈ పరిణామంతో షాక్ తిన్న యువతి భయంతో బయటకు పరుగులు తీసింది.

బాధితురాలు వెంటనే ఎస్‌ఆర్‌నగర్ పోలీసుకు ఫిర్యాదు చేసింది. కేసు నమోదు చేసిన పోలీసులు... నితిన్‌రెడ్డిని అదుపులోకి తీసుకొని రిమాండ్‌కు తరలించారు. మెట్రో రైలు ప్రారంభమయ్యాక ఇది రెండో ఘటన. గతంలో కూడా ఓ వ్యక్తి యువతుల ఫోటోలను అసభ్యంగా తీస్తూ అడ్డంగా దొరికిపోయాడు. ఆ ఘటన మరువక ముందే మళ్లీ జరగడం కలకలంరేపింది. ఆడవాళ్లకు ఇబ్బందులు ఎదురవుతుండటంతో... మెట్రో స్టేషన్లలో భద్రత పెంచాలని ప్రయాణికులు కోరుతున్నారు. అప్పుడే ఇలాంటి ఘటనకు చెక్ పెట్టవచ్చనే అభిప్రాయాలు వ్యక్తమవుతున్నాయి.