చర్లపల్లి జైలు: వార్డర్‌పై ఖైదీలు మూకుమ్మడి దాడి!

శిక్ష అనుభవిస్తోన్న ఖైదీలు జైలు వార్డర్‌పై దాడికి పాల్పడి, తీవ్రంగా గాయపరిచిన ఘటన చర్లపల్లి జైల్లో బుధవారం చోటుచేసుకుంది. బ్రహ్మపుత్ర బ్యారక్‌-2లో జరిగిన ఈ ఘటనలో వార్డర్ రాజశేఖర్ గాయపడ్డారు. విధుల్లో భాగంగా బుధవారం ఉదయం 8.30 గంటలకు బ్రహ్మపుత్ర బ్యారక్-2లోకి వెళ్లిన వార్డర్ రాజశేఖర్, బెడ్‌ఫైల్ చేయాలని రిమాండ్ ఖైదీ ఖలీల్‌ను ఆదేశించారు. ఈ సమయంలో అతడి వెనుక నుంచి వచ్చిన ముబారక్, ఇర్ఫాన్ అనే ఖైదీలు వార్డర్‌తో గొడవకు దిగారు. ఆయనతో వాగ్వాదానికి దిగిన ఇద్దరూ, వార్డర్ రాజశేఖర్‌పై దాడిచేశారు. దీంతో తోటి ఖైదీలు వారి నుంచి వార్డర్‌ను విడిపించి, బ్యారక్ బయటకు పంపారు. దీనిపై ఖైదీలను ప్రశ్నించేందుకు జైలు అధికారులు అక్కడకు రాగా, వారిపై కూడా దాడికి యత్నించారు. బ్యారక్‌లో ఒకవేళ అధికారులు వస్తే దాడిచేయడానికి క్యారమ్‌బోర్డ్ ఫ్రేమ్, ఇతర సామాగ్రిని సిద్ధం చేశారు. అలాగే మరో గంట తర్వాత వచ్చిన డిప్యూటీ జైలర్, జైలర్లపై కూడా దాడికి ప్రయత్నించినట్టు సీసీ కెమెరాల్లో రికార్డయ్యింది. దీనిపై ఖైదీలతో మాట్లాడిన సూపరింటిండెంట్, వార్డర్‌ను సముదాయించారు.

గాయపడిన రాజశేఖర్‌ను చికిత్స కోసం జైలు ఆవరణలోని హాస్పిటల్‌లో చేర్పించారు. అతడి పరిస్థితి నిలకడగా ఉండటంతో అధికారులు కుదుటపడ్డారు. వార్డర్‌పై దాడిచేసిన ఇర్ఫాన్ అనే ఖైదీ ఓ హత్య కేసులో నిందితుడిగా ఉన్నాడు. రెండు నెలల కిందటే చర్లపల్లి జైలుకు వచ్చిన అతడి మానసిక పరిస్థితి సక్రమంగా లేదని అధికారులు తెలియజేశారు. ఈ ఘటనపై పోలీసులకు జైలు సూపరింటిండెంట్ ఫిర్యాదు చేయడంతో కేసు నమోదుచేసి దర్యాప్తు చేపట్టారు. అయితే, దాడి సమయంలో ముగ్గురు ఖైదీలు గంజాయి సేవించినట్టు తెలుస్తోంది. దాడికి పాల్పడిన ఇర్ఫాన్‌ను సింగిల్ సెల్‌కు మార్చినట్టు సమాచారం. కట్టుదిట్టమైన భద్రత ఉండే జైల్లోకి గంజాయి ఎలా వచ్చిందనేది చర్చనీయాంశంగా మారింది. ఇందులో సిబ్బంది ప్రమేయం ఉందా అనే అనుమానాలు వ్యక్తమవుతున్నాయి. గతంలోనూ చర్లపల్లి జైల్లో డిప్యూటీ జైలర్, ఇద్దరు వార్డర్లపై ఖైదీలు దాడిచేసి గాయపరిచారు. 2011 జనవరి 31న జరిగిన ఈ ఘటనలో సిబ్బంది తీవ్రంగా గాయపడ్డారు.