మరోసారి నగరాన్ని వణికించిన భారీ వర్షం

హైదరాబాద్‌ మరోసారి భారీ వర్షంతో అస్తవ్యస్తమైంది. నగరంలోని పలు ప్రాంతాల్లో మంగళవారం సాయంత్రం భారీ వర్షం కుండపోతలా కుమ్మరించింది. దీంతో పలు ప్రాంతాలు నీట మునగగా చాలా ప్రాంతాల్లో రోడ్లు జలమయమయ్యాయి. దీంతో అనేక చోట్ల రోడ్లు పూర్తిగా ట్రాఫిక్ జామ్ అయ్యాయి.

సికింద్రాబాద్, బంజారాహిల్స్, హిమాయత్ నగర్, నారాయణగూడ, చిక్కడపల్లి, తార్నాకా. హబ్సిగూడ, ఉప్పల్, నాచారం, మల్లాపూర్, ఛార్మినార్‌, యాకుత్‌ పురా, అప్ఝల్‌ గంజ్‌, దిల్ సుఖ్ నగర్, సరూర్ నగర్, ఎల్బీనగర్, హయత్‌నగర్, చాంద్రాయణ గుట్ట, శంషాబాద్ ప్రాంతాల్లో భారీ వర్షం కురిసింది. సోమవారం నాటి అనుభవాల దృష్ట్యా ఈసారి ముందే మేలుకున్న జీహెచ్ఎంసీ అధికారులు పలు ముందస్తు జాగ్రత్త చర్యలతో బిజీ అయ్యారు. సోమవారం కురిసిన వర్షాలకి దెబ్బతిన్న రహదారులకి మరమ్మతులు చేస్తూనే మరోవైపు ట్రాఫిక్ కి అంతరాయం కలగకుండా వుండేందుకు చర్యలు తీసుకున్నారు. మంత్రి కేటీఆర్ జీహెచ్ఎంసీ అధికారులతో భేటీ ​ నగరంలో తాజా పరిస్థితిని సమీక్షించారు.

ఇదిలావుంటే మరో రెండు రోజులపాటు హైదరాబాద్ సిటీతోపాటు తెలంగాణ వ్యాప్తంగా భారీ వర్షం కురిసే అవకాశం ఉందని వాతావరణ శాఖ హెచ్చరించింది. ఐఎండీ డైరెక్టర్ వైకే రెడ్డి మీడియాకు తెలిపిన వివరాల ప్రకారం ఉపరితల ద్రోణి ప్రభావంతో మంగళవారం నగరంతో పాటు రాష్ట్రవ్యాప్తంగా పలు చోట్ల భారీ వర్షాలు కురిసే అవకాశం ఉంది. భారీ వర్షాల నేపథ్యంలో ప్రజలు అప్రమత్తంగా ఉండాలని వైకే రెడ్డి సూచించారు.