Hyderabad Rain: పగలు ఠారెత్తించిన ఎండ.. రాత్రి ఉరుములు, మెరుపులతో వర్షం

హైదరాబాద్‌: ఆదివారం రాత్రి నగరంలోని పలు ప్రాంతాల్లో ఉరుములు, మెరుపులతో కూడిన వర్షం కురిసింది. పగలంతా భానుడు భగభగలాడగా.. సాయంత్రానికి వాతావరణం చల్లబడింది. కాసేపటికే భారీ స్థాయిలో ఉరుములు, మెరుపులతో వర్షం కురిసింది. ఉరుముల శబ్దానికి ఒకింత భయపడినప్పటికీ వర్షం తగ్గిన తర్వాత మాత్రం భాగ్యనగర వాసులు వేడి వాతావరణం నుంచి ఉపశమనం పొందారు. జూబ్లీహిల్స్, బంజారాహిల్స్, ఖైరతాబాద్, ఎల్బీ నగర్, అమీర్ పేట్, ఎస్ఆర్ నగర్, సనత్ నగర్, కూకట్‌పల్లి, మూసాపేట, బోరబండ, ఎర్రగడ్డ, నాంపల్లి, మలక్ పేట్ తదితర ప్రాంతాల్లో వర్షం కురిసింది. సెలవు దినం కావడంతో భారీ ట్రాఫిక్ జామ్‌ల ఇబ్బంది తప్పింది.

ఆదివారం పగటి పూట హైదరాబాద్ సహా రాష్ట్రవ్యాప్తంగా ఉష్ణోగ్రతలు భారీగా పెరిగాయి. రామగుండం, కొత్తగూడెం పట్టణాల్లో గరిష్టంగా 43.4 డిగ్రీల ఉష్ణోగ్రత నమోదైంది. ఎండ వేడి అనూహ్యంగా పెరగడంతో పగటిపూట నగరవాసులు ఇబ్బందులు పడ్డారు.
కానీ హైదరాబాద్‌లో రాత్రి వర్షం కురవడంతో వాతావరణం చల్లబడింది. రాత్రి 11 గంటలు దాటిన తర్వాత కూడా మరోసారి వర్షం కురిసింది.

ఇదే రోజు సాయంత్రం ఉప్పల్ స్టేడియంలో సన్‌రైజర్స్ హైదరాబాద్, రాయల్ ఛాలెంజర్స్ బెంగళూరు మధ్య ఐపీఎల్ మ్యాచ్ జరిగింది. ఆదివారం నగరంలో వర్షం కురిసే అవకాశం ఉందని స్కై మేట్ అంచనా వేసింది. కానీ లక్కీగా మ్యాచ్‌ అయిపోయాక వర్షం కురిసింది. ఈ మ్యాచ్‌లో ఓపెనర్లు బెయిర్ స్టో, వార్నర్ శతకాలు బాదడంతో హైదరాబాద్ జట్టు 231 పరుగుల భారీ స్కోరు చేసింది. బదులుగా బెంగళూరు 113 పరుగులకే ఆలౌటయ్యింది.
ఆరెంజ్ ఆర్మీ ఘన విజయాన్ని వరణుడు కూడా సెలబ్రేట్ చేసుకున్నాడని క్రికెట్ ఫ్యాన్స్ ఛలోక్తులు విసిరారు. ఈ వర్షమేదో రెండు గంటల ముందు పడిన బాగుండేది. కోహ్లికి ఊరట లభించేదని విరాట్ ఫ్యాన్స్ సోషల్ మీడియాలో మెసేజ్‌లు పెట్టారు.