హైదరాబాద్‌: పెళ్లైన 5 నెలలకే టెకీ ఆత్మహత్య.. అత్తింటి వేధింపులే కారణమా.!

హైదరాబాద్‌లో సాఫ్ట్‌వేర్ ఉద్యోగిని ఆత్మహత్య కలకలంరేపింది. చిత్రపురి కాలనీలో నివాసం ఉండే రూపిని.. ఆదివారం ఇంట్లోనే ఉరి వేసుకొని ప్రాణాలు తీసుకుంది. కొద్దిసేపటి తర్వాత ఆమెను గమనించిన కుటుంబ సభ్యులు షాక్ అయ్యారు. ఆమె మృతి గురించి తెలుసుకున్న బంధువులు పోలీసులకు ఫిర్యాదు చేశారు. అత్తింటి వేధింపులే కారణమని ఆరోపిస్తున్నారు. కేసు నమోదు చేసుకున్న పోలీసులు.. మృతదేహాన్ని పోస్ట్‌మార్టమ్‌కు తరలించారు. ఆమె భర్తను అదుపులోకి తీసుకొని ప్రశ్నిస్తున్నారు.

పశ్చిమగోదావరి జిల్లా ఏలూరుకు చెందిన రూపిని.. అదే ప్రాంతానికి చెందిన సందీప్ అనే వ్యక్తిని ఐదు నెలల క్రితం వివాహం చేసుకుంది. రూపిని సాఫ్ట్‌వేర్ ఉద్యోగిని కాగా.. సందీప్ జిమ్ ట్రైనర్‌గా పనిచేస్తున్నాడు. ఇద్దరూ కలిసి చిత్రపురి కాలనీలోని L-4లో నివాసం ఉంటున్నారు. ఐదు నెలలుగా కాపురం సాఫీగానే సాగిపోతోంది. ఏం జరిగిందో ఆదివారం రూపిని తన ఇంట్లోనే ఉరి వేసుకొంది. అయితే కట్నం కోసం అత్తింటివారు రూపినిని వేధిస్తున్నట్లు ఆమె బంధవులు చెబుతున్నారు.