అది హిందూ సమాజానికే అవమానకరం.. వీహెచ్‌పీ, భజరంగ్ దళ్ ఆందోళన

శ్రీ పీఠాధిపతి స్వామి పరిపూర్ణానందపై విధించిన నగర బహిష్కరణను తెలంగాణ ప్రభుత్వం వెంటనే ఉపసంహరించుకోవాలని డిమాండ్‌ చేస్తూ హైదరాబాద్ నగరంలోని పలు చోట్ల గురువారం (జులై 19) ఆందోళన నిర్వహించారు. ఈ నిరసన కార్యక్రమంలో బీజేపీ, విశ్వ హిందూ పరిషత్ (వీహెచ్‌పీ), భజరంగ్‌దళ్‌ పాల్గొన్నాయి. కోఠి కూడలిలో వీహెచ్‌పీ కార్యకర్తలు రాస్తారోకో చేపట్టారు. పోలీసులు వారిని అరెస్టు చేసి సుల్తాన్‌ బజార్ పోలీస్‌స్టేషన్‌కు తరలించారు. ఈ అరెస్టులను నిరసిస్తూ వీహెచ్‌పీ నాయకులు పోలీస్ స్టేషన్ ముందు ధర్నా చేపట్టడంతో ఉద్రిక్తత నెలకొంది.

అమీర్‌పేటలోని మైత్రివనం వద్ద వీహెచ్‌పీ కార్యకర్తలు రాస్తోరోకో నిర్వహించి రహదారిని దిగ్బంధం చేశారు. దీంతో వాహనాల రాకపోకలకు తీవ్ర అంతరాయం ఏర్పడింది. ఆరాంఘర్ చౌరస్తాలో నిరసనకారులు ధర్నా చేపట్టడంతో నలువైపులా కిలోమీటర్ల మేర ట్రాఫిక్ నిలిచిపోయింది. ఆరాంఘర్ కూడలి వద్ద కార్యకర్తలు భైఠాయించడంతో ఉద్రిక్తత నెలకొంది.
వీహెచ్‌పీ, భజరంగ్‌దళ్ కార్యకర్తలు ప్లకార్డులు ప్రదర్శిస్తూ.. ప్రభుత్వానికి వ్యతిరేకంగా నినాదాలు చేశారు. స్వామి పరిపూర్ణానందపై నగర బహిష్కరణ విధించడం హిందూ సమాజానికే అవమానకరమని అన్నారు. ప్రభుత్వం హిందూ వ్యతిరేక కార్యక్రమాలను వెంటనే ఆపేయాలని డిమాండ్ చేశారు. స్వామీజీపై విధించిన బహిష్కరణను ఉపహరించుకోవాలని.. రాష్ట్ర ప్రభుత్వం స్వామీజీకి, హిందూ సమాజానికి క్షమాపణ చెప్పి ఆయన్ని రాష్ట్రంలోకి ఆహ్వానించాలని పేర్కొన్నారు.

రంగంలోకి దిగిన పోలీసులు పరిస్థితిని చక్కదిద్దారు. అందోళనకారులను ఎక్కడికక్కడ అదుపులోకి తీసుకుని పోలీసు స్టేషన్లకు తరలించారు. ట్రాఫిక్ పోలీసులు వాహనాల రాకపోకలను చక్కదిద్దారు. ముందు జాగ్రత్తగా కొన్ని వాహనాలను ప్రత్యామ్నాయ మార్గాలకు మళ్లించారు.