హైదరాబాద్ హలీమ్‌కి భలే గిరాకీ గురూ..!

రంజాన్ మాసంలో మనందరికీ గుర్తొచ్చే వంటకం హలీమ్. ముఖ్యంగా హైదరాబాద్‌లో ఉండేవారికి హలీమ్ గురించి చెప్పాల్సిన అవసరంలేదు. ఎంతో ఇష్టంగా ఆరగించే హైదరాబాద్ దమ్‌కీ బిర్యానీని కూడా రంజాన్ మాసంలో హలీమ్ కోసం పక్కన పెడతారంటే అతిశయోక్తి కాదు. వాస్తవానికి ఇది ముస్లింల వంటకమే అయినప్పటికీ మిగిలిన మతాలకు చెందిన వారూ లొట్టలేసుకుని తింటారు. ఈ పవిత్ర మాసంలో హైదరాబాద్‌లోని హలీమ్ సెంటర్లన్నీ కలకలాడిపోతాయి. ముఖ్యంగా పిస్తా హౌజ్, షా గౌస్, పారడైజ్, బావర్చీ వంటి పేరొందిన రెస్టారెంట్ల వద్ద జనం ఎగబడుతుంటారు.

రోజంతా ఉపవాస దీక్షలో ఉన్న ముస్లిం సోదరులు సాయంత్రం ఇఫ్తార్‌లో పాల్గొంటారు. ఇఫ్తార్‌లో ప్రధానమైన వంటకం హలీమ్. పొట్టేలు మాంసం, గోధుమలు, స్వచ్ఛమైన నెయ్యి, డ్రై ఫ్రూట్స్‌తో తయారుచేసే ఈ హలీమ్‌లో ఎన్నో పోషక విలువలు ఉన్నాయి. ఇవి శరీరానికి కావాల్సిన శక్తిని అందజేస్తాయి. అందుకనే సాయంత్రం ఇఫ్తార్ విందులో హలీమ్ తప్పనిసరి. హైదరాబాద్‌లో ముస్లింలతో పాటు మిగిలిన మతాలకు చెందిన వారు కూడా హలీమ్‌‌పై బాగా ఇష్టం పెంచుకున్నారు. అందుకే ఈ సీజన్‌లో నగరంలో ఇదో పెద్ద బిజినెస్. గతేడాది హైదరాబాద్‌లో హలీమ్ బిజినెస్ రూ. 500 కోట్లు దాటింది. ఈ డిమాండ్‌ కారణంగా కొన్ని ప్రాంతాల్లో 365 రోజుల పాటు హలీమ్ బట్టీలు నడుస్తున్నాయి. మరి ఈ ఏడాది హైదారాబాద్ హలీమ్ ఎంత బిజినెస్ చేసిందో చూడాలి..!