సినిమాలకు సమయం లేదు.. ప్రజాసేవకే ఈ జీవితం: పవన్ కళ్యాణ్

జనసేన అధ్యక్షుడు, పవర్ స్టార్ పవన్ కళ్యాణ్ మళ్లీ సినిమాల్లో నటించబోతున్నారనే వార్తలు గత కొద్ది రోజులుగా వినిపిస్తున్నాయి. సాయిధరమ్ తేజ్ తమ్ముడు వైష్ణవ్ తేజ్ హీరోగా పరిచయమవుతోన్న సినిమాలో పవన్ కళ్యాణ్ ఓ ముఖ్య పాత్ర పోషిస్తున్నారని వార్తలు వచ్చాయి. ఇదిలా ఉంటే, పవన్ కళ్యాణ్ హీరోగా త్వరలో ఓ సినిమా చేయబోతున్నారని.. ఎన్నికల ముందే ఈ చిత్రాన్ని విడుదల చేయాలన్న కృతనిశ్చయంతో ఉన్నారంటూ ఓ ప్రముఖ వార్తా పత్రికి పేర్కొంది. అయితే ఈ వార్తలపై తాజాగా పవన్ కళ్యాణ్ స్పందించారు. జనసేన పార్టీ అధ్యక్షుడిగా ప్రెస్‌ నోట్‌ను విడుదల చేశారు.

సినిమాల్లో నటించేంత సమయం తనకు లేదని స్పష్టం చేశారు. ప్రజాసేవకే తన జీవితం అంకితమన్నారు. ‘నేను త్వరలో ఒక సినిమా చేయబోతున్నట్లు కొన్ని మాధ్యమాల్లో వచ్చిన వార్తలు నిజం కాదు. ఏ చిత్రంలోనూ నటించేందుకు అంగీకారం తెలపలేదు. సినిమాలో నటించేందుకు అవసరమైన సమయం లేదు. ప్రజా జీవితానే పూర్తి సమయం కేటాయించాను. ప్రజల్లోనే ఉంటూ, జనసైనికులు, అభిమానులతో కలిసి పాలకుల తప్పిదాలను బలంగా వినిపిస్తున్న తరుణమిది. సినిమాలపై దృష్టి సారించడం లేదు. నా ఆలోచనలు అన్నీ ప్రజాక్షేమం కోసమే. నా తపన అంతా సమసమాజ స్థాపన కోసమే’ అంటూ తన ప్రకటనలో పవన్ కళ్యాణ్ పేర్కొన్నారు.