ఖమ్మం: నమ్మినోళ్లే ముంచారు, సూసైడ్ చేసుకుంటున్నా.. వ్యాపారి సెల్ఫీ వీడియో

అప్పుల బాధతో ఆత్మహత్య చేసుకుంటున్నానంటూ ఖమ్మంకు చెందిన వ్యాపారి తీసుకున్న సెల్ఫీ వీడియో వైరల్ అవుతోంది. సూసైడ్ చేసుకుంటున్నానంటూ రాయపాటి నరసింహరావు ఈ వీడియోను తన స్నేహితులకు పంపడంతో బయటపడింది. తాను నమ్మిన వ్యక్తులు మోసం చేస్తారని ఊహించలేదని.. వ్యాపారంలో తీవ్రంగా నష్టపోయానని కన్నీళ్లు పెట్టుకున్నాడు. నమ్మినోళ్లే మోసం చేయడంతో అప్పులు చేయాల్సి వచ్చిందని.. వడ్డీకి డబ్బు తెచ్చినవారికి.. రెండింతల వడ్డీలు కట్టానన్నాడు.
తాను ఇంటికొస్తున్నానని చెప్పి మోసం చేసినందుకు క్షమించాలని వీడియోలో తన భార్య, కుటుంబాన్ని కోరాడు. ఇంటికి తిరిగి రావాలనుకున్నా.. తనవల్ల కావడం లేదన్నాడు. ఈ అప్పుల బాధను భరించలేకపోతున్నానని.. చావే శరణ్యం ఆత్మహత్య చేసుకుంటానని చెప్పాడు. ఎవరెవరికి ఎంత బాకీ చెల్లించాల్సి ఉందో ఓ జాబితాను రాసి పెట్టాడు. ఈ చిట్టాను తన స్నేహితులకు కూడా పంపాడు.

ఇటు తన భర్త ఐదురోజులుగా కనపడటం లేదంటూ అతడి భార్య ఫిర్యాదు చేసింది. తాజాగా నరసింహారావు సెల్ఫీ వీడియో బయటపడటంతో.. కుటుంబం ఆందోళనలో ఉంది. అతడి కోసం గాలింపు మొదలుపెట్టారు. అయితే నరసింహరావు ఎక్కడున్నాడు.. వీడియో ఎక్కడ రికార్డ్ చేశాడన్నది క్లారిటీ లేదు. అతడి ఆచూకీ కనిపెట్టే పనిలో ఉన్నారు పోలీసులు.