భయపడే సీఎంను కాదు.. మెడలు వంచుతా: చంద్రబాబు

ఇతర రాష్ట్రాల ముఖ్యమంత్రుల తరహాలో తాను కేంద్ర ప్రభుత్వానికి భయపడే సీఎంను కాదని, తిరగబడి వారిపై పోరాటం చేసి వారి మెడలు వంచే వ్యక్తినంటూ టీడీపీ అధినేత చంద్రబాబు నాయుడు వ్యాఖ్యానించారు. విభజన హామీలను నెరవేర్చాలని, ప్రత్యేక హోదా ఇవ్వాలని డిమాండ్ చేస్తే కేంద్ర ప్రభుత్వం ఏపీపై దాడులకు దిగుతోందని ఆయన ఆరోపించారు.

ప్రకాశం జిల్లా మార్టూరు మండలం డేగరమూడి గ్రామదర్శినిలో శుక్రవారం సీఎం చంద్రబాబు పాల్గొన్నారు. ఈ సందర్భంగా చంద్రబాబు మాట్లాడుతూ.. ఏపీకి ఇచ్చిన హామీలను నెరవేర్చాలని కోరినందుకే టీడీపీ నేతల ఇళ్లు, కార్యాలయాల్లో ఐటీ సోదాలు చేయిస్తున్నారని ఆరోపించారు. అయినా తాను వెనకడుగు వేయనని స్పష్టం చేశారు. తాను భయపడే సీఎంను ఎంతమాత్రం కాదని, కేంద్రంపై తిరగబడి సాధించుకునే సీఎంనని పేర్కొన్నారు.

కేంద్రం మెడలు వంచేందుకు సిద్ధంగా ఉండాలని చంద్రబాబు పిలుపునిచ్చారు. అందుకే తాను ఢిల్లీలో పర్యటించి ఎన్డీఏయేతర పార్టీల నేతలతో కీలక భేటీలు నిర్వహించి, మద్దతు కూడగడుతున్నానని చెప్పారు. రాష్ట్ర అభివృద్ధిని అడ్డుకునే ప్రతిపక్షానికి ప్రజలను ఓట్లు అడిగే హక్కుందా అని చంద్రబాబు ప్రశ్నించారు. సామాజిక వర్గాలను చూసి ఓట్లేయవద్దని, కేవలం అభివృద్ధిని చూసి వచ్చే ఎన్నికల్లో ప్రజలు ఓట్లేయాలంటూ ఏపీ సీఎం సూచించారు.

కాగా, చంద్రబాబు ఢిల్లీ పర్యటనలో గురువారం పలువురు జాతీయ నేతలతో వరుసగా భేటీ అయ్యారు. ఎన్సీపీ అధినేత శరద్ పవార్, నేషనల్ కాన్ఫరెన్స్ అధినేత ఫరూఖ్ అబ్దుల్లా, రాష్ట్రీయ లోక్‌దళ్ అధ్యక్షుడు అజిత్‌సింగ్‌, కాంగ్రెస్ పార్టీ సీనియర్ నేత గులాం నబీ ఆజాద్‌, తదితర నేతలతో ఎన్డీయేతర పార్టీలను ఒకేతాటిపైకి తేవాలని చర్చించారు. తెలంగాణలో పొత్తులపై కాంగ్రెస్ పార్టీ అధ్యక్షుడు రాహుల్ గాంధీతో చంద్రబాబు భేటీ అయ్యి.. ఎన్నికల వ్యూహాలపై చర్చలు జరిపినట్లు సమాచారం.