అమెరికాలో పెట్టుబడి పెట్టు... గ్రీన్‌కార్డు పట్టు

గ్రీన్ కార్డ్ కోసం ఎదురు చూస్తున్నవారికి శుభవార్త. అమెరికాలో శాశ్వత నివాసం కోరుకునే వారికి టెన్షన్ వద్దంటున్నారు... న్యూయార్క్ ఇమ్మిగ్రేషన్ ఫండ్ పార్టనర్‌ అరుణ్ నందా. పెట్టుబడి పెట్ట... గ్రీన్ కార్డ్ పట్టమని చెబుతున్నారు. అలాంటి వారికి ఈబీ-5 ఇమ్మిగ్రేషన్ ఇన్వెస్ట్ ప్రోగ్రాం చక్కటి అవకాశమని చెప్పారు. అమెరికన్ వీసాలకు సంబంధించిన నిబంధనలు కఠినతరం కావడంతో... ప్రభుత్వం ఈబీ-5 ఇమ్మిగ్రేషన్ ఇన్వెస్ట్ ప్రోగ్రామ్ రూపంలో చట్టాన్ని ప్రవేశ పెట్టిందని తెలిపారు. దీనిపై పారిశ్రామికవేత్తలు, వృత్తినిపుణులు, డాక్టర్లు, ఇంజినీర్లు, ఇతర సంపన్నవర్గాలతో హైదరాబాద్ మాదాపూర్‌లోని ఓ హోటల్‌లో అవగాహన సదస్సు నిర్వహించారు. దీనిిపై న్యూయార్క్ ఇమ్మిగ్రేషన్ సభ్యులు అవగాహన కల్పించారు.

ఈబీ-5 ఇమ్మిగ్రేషన్‌ ఇన్వెస్ట్‌ ప్రోగ్రాం కింద... ఐదు లక్షల డార్లు పెట్టుబడి పెట్టాల్సి ఉంటుంది. ఇలా చేస్తే ఐదేళ్లలో గ్రీన్ కార్డు పొందవచ్చు. 10మంది అమెరికన్ పౌరులకు ఉపాధి కూడా కల్పించాల్సి ఉంటుంది. అప్పుడు మాత్రమే గ్రీన్ కార్డు పొందేందుకు అర్హుడవుతారు. పెట్టుబడి పెట్టిన వ్యక్తితో పాటూ భార్య, 21 ఏళ్లలోపు ఉన్న వారి పిల్లలకు గ్రీన్ కార్డ్ అందుతుంది. ఈబీ-5 వీసా ప్రక్రియ పూర్తి కావడానికి భారత పౌరులకు కేవలం 18 నెలలు మాత్రమే పడుతుందట. ఈ వీసాల ద్వారా ఉద్యోగి వేతనాలు ఆమోద యోగ్యంగా ఉంటాయి.