కేసీఆర్ మాట జారారు కాని... కవిత

ప్రధాని మోదీని సీఎం కేసీఆర్ కావాలని ఏకవచనంతో సంబోధించలేదని నిజామాబాద్ ఎంపీ కవిత అన్నారు. కేసీఆర్ వ్యాఖ్యల్లో పొరపాటు దొర్లిన మాట వాస్తవమే అయినప్పటికీ దేశ ప్రధానిని అవమానపర్చే సంకుచిత ధోరణి సీఎం కేసీఆర్‌కు లేదన్నారు. మోదీని కించపర్చే ఉద్దేశంతో కేసీఆర్ ప్రధానిని ఏకవచనంతో సంభోదించలేదని అన్నారు. ఈ అంశాన్ని భాజపా కావాలని రాద్ధాంతం చేస్తోందని అన్నారు. పార్లమెంట్లో అనుసరించాల్సిన వ్యూహాలపై సీఎం కేసీఆర్ రేపు పార్టీ ఎంపీలతో సమావేశం కానున్నారని చెప్పారు. విభజన హామీలను అమలు చేయాలని పార్లమెంట్ సమావేశాల్లో డిమాండ్ చేయనున్నట్లు చెప్పారు.

అంతకు ముందు ఇదే అంశంపై కేంద్ర రక్షణశాఖ మంత్రి నిర్మల సీతారామన్ మాట్లాడుతూ... ఏకంగా దేశ ప్రధానిని కేసీఆర్ ఏకవచనంతో సంభోదించడం సరికాదని అన్నారు. కేసీఆర్ తీరు యావత్ దేశానికి బాధ కలిగించిందని అన్నారు. తెలంగాణ సీఎంగా రాజ్యాంగబద్ధమైన పదవిలో ఉన్న కేసీఆర్ అలా మాట్లాడి ఉండకపోయి ఉంటే బాగుండేదని అసహనం వ్యక్తం చేశారు. రాజకీయ విమర్శల చేసేటప్పుడు సరైన పదజాలాన్ని వాడాల్సిన బాధ్యత అందరిపై ఉందని గుర్తుచేశారు.