పవన్ పై జగన్ హాట్ కామెంట్..!

‘చంద్రబాబు నాయుడు పార్ట్ నర్ పవన్ కల్యాణ్ ఏ ఉద్దేశంతో చెప్పినా మేం కేంద్ర ప్రభుత్వంపై అవిశ్వాస తీర్మానానికి సై అన్నాం. కేంద్రంపై అవిశ్వాస తీర్మానం ప్రవేశ పెట్టనున్నాం. మరి ఇప్పుడు చంద్రబాబును ఆయన పార్ట్ నర్ అవిశ్వాస తీర్మానానికి అనుకూలంగా ఒప్పించాలి. మేం ప్రవేశ పెట్టే అవిశ్వాస తీర్మానానికి తెలుగుదేశం పార్టీ చేత మద్దతు పలికించాలి..’ అని అన్నారు వైఎస్సార్ కాంగ్రెస్ పార్టీ అధినేత జగన్ మోహన్ రెడ్డి. జనసేన అధ్యక్షుడు పవన్ కల్యాణ్ ను ఉద్దేశించి జగన్ ఈ వ్యాఖ్యలు చేశారు. ఈ నెల ఐదో తేదీన ఢిల్లీలో వైఎస్సార్ కాంగ్రెస్ పార్టీ ప్రత్యేక హోదా డిమాండ్ తో ధర్నా చేపట్టనున్న నేపథ్యంలో.. జగన్ ఈ వ్యాఖ్య చేశారు. ప్రకాశం జిల్లా పాదయాత్రలో భాగంగా జగన్ తమ పార్టీ వారి ఢిల్లీ యాత్రను జెండా ఊపి ప్రారంభించారు.

రాష్ట్ర ప్రయోజనాల విషయంలో తెలుగుదేశం, వైఎస్సార్ కాంగ్రెస్ పార్టీకి చిత్తశుద్ధి ఉంటే.. కేంద్ర ప్రభుత్వంపై అవిశ్వాస తీర్మానం ప్రవేశ పెట్టాలి అని ఇటీవల పవన్ వ్యాఖ్యానించిన సంగతి తెలిసిందే. ఆ వెంటనే వైఎస్సార్ కాంగ్రెస్ పార్టీ అధినేత జగన్ అవిశ్వాస తీర్మానానికి సై అన్నారు. కేంద్రంపై తామే అవిశ్వాస తీర్మానం పెడతామని, తెలుగుదేశం ప్రవేశ పెట్టినా తాము మద్దతు పలుకుతామని జగన్ ప్రకటించారు. అవిశ్వాసానికి అనుకూలంగా తెలుగుదేశాన్ని ఒప్పించాలని పవన్ కల్యాణ్ ను ఉద్దేశించి వ్యాఖ్యానించారు జగన్.

అయితే తెలుగుదేశం పార్టీ అవిశ్వాసానికి అనుకూలంగా లేదు. అది ఆఖర్లో అని అంటోంది తెలుగుదేశం. ఈ నేపథ్యంలో అవిశ్వాస తీర్మానానికి ఇతర పార్టీలను కూడా ఒప్పిస్తా అని పవన్ కల్యాణ్ ఆ మధ్య ఒక ప్రకటన చేశారు. అయితే తెలుగుదేశం పార్టీ అవిశ్వాసానికి నో అంటున్నప్పటికీ పవన్ ఆ పార్టీ విషయంలో పెదవి విప్పడం లేదు. ఈ నేపథ్యంలో జగన్ మరోసారి స్పందించారు. టీడీపీని అవిశ్వాసానికి అనుకూలంగా నిలబెట్టాలని పవన్ కల్యాణ్ ను ఉద్దేశించి జగన్ వ్యాఖ్యానించారు. మరి ఈ దీనిపై పవన్ కల్యాణ్ ఎలా స్పందిస్తారో!