చంద్రన్న గుర్తుకు తెస్తోన్న జగనన్న.. సీఎం పేరిట రెండు పథకాలు

2019-20 ఆర్థిక సంవత్సరానికి గానూ ఏపీ సర్కారు పూర్తి స్థాయి బడ్జెట్‌ను ప్రవేశపెట్టింది. రూ.2,27,974 కోట్లతో బుగ్గన రాజేంద్రనాథ్ రెడ్డి బడ్జెట్‌ను ప్రవేశపెట్టారు. నవరత్నాలు హామీతో అధికారంలోకి వచ్చిన వైఎస్ జగన్.. తొలి బడ్జెట్లో సంక్షేమానికి అధిక ప్రాధాన్యం ఇచ్చారు. మేనిఫెస్టోలో పేర్కొన్న అంశాలకు బడ్జెట్లో ప్రాధాన్యం దక్కింది. రైతు భరోసా, ఫించన్లు, ఆరోగ్య శ్రీ, కల్యాణ కానుక తదితర పథకాలకు వైఎస్ఆర్ పేరును పెట్టారు. తండ్రికి తగ్గ తనయుడు అనిపించుకోవడానికి కృషి చేస్తున్న జగన్.. దివంగత సీఎం వైఎస్ పేరును ప్రధాన పథకాలకు పెట్టారు.

బడ్జెట్లో మరో ఆశ్చర్యకరమైన అంశం ఏంటంటే.. రెండు పథకాలకు జగన్ పేరు పెట్టారు. గత ప్రభుత్వ హయాంలో చంద్రన్న సంక్రాతి కానుక, చంద్రన్న బీమా, చంద్రన్న చేయూత తదితర పథకాలకు నాటి సీఎం పేరు పెట్టినట్టుగానే.. జగన్ సర్కారు రెండు పథకాలకు జగనన్న అమ్మఒడి, జగనన్న విద్యా దీవెనగా నామకరణం చేసింది.

చదవండి: ఏపీ బడ్జెట్ ముఖ్యాంశాలు

అమ్మఒడి పథకం జగన్ బ్రెయిన్ చైల్డ్. ఈ పథకాన్ని రూపకల్పన చేసింది ఆయనే కాబట్టి.. సీఎం పేరిట ఈ పథకాన్ని తీసుకొచ్చామని.. ఆయన్ను ఒప్పించడానికి ఎంతో కష్టపడాల్సి వచ్చిందని ఆర్థిక మంత్రి బుగ్గన తెలిపారు. ఈ పథకం కింద చదువుకునే విద్యార్థి తల్లి ఖాతాలో ఏటా రూ.15 వేలు జమ చేయనున్నారు. తొలుత ఈ పథకాన్ని ప్రభుత్వ పాఠశాలల్లో చదువుకుంటున్న పిల్లలకు మాత్రమే పరిమితం చేస్తారని వార్తలొచ్చాయి. కానీ ప్రైవేట్ స్కూళ్లలో చదివే విద్యార్థులకు కూడా దీన్ని వర్తింపజేశారు. అంతేకాకుండా.. ఇంటర్ విద్యార్థులకు కూడా వర్తింపజేస్తూ ప్రభుత్వం నిర్ణయం తీసుకుంది. అమ్మఒడి పథకానికి రూ.6455 కోట్లు ప్రకటించారు. వైఎస్ హయాంలో రూపుదిద్దుకున్న ఫీజు రియింబర్స్‌మెంట్ పథకానికి కూడా జగన్ పేరు ‘జగన్ అన్న విద్యా దీవెన’ పెట్టడం విశేషం. దీనికి రూ.4962 కోట్లు ప్రకటించారు.

రాష్ట్రాన్ని 30 ఏళ్లపాటు పాలించాలని, తండ్రి ఫొటో పక్కన తన ఫొటో కూడా ఉండాలని కలలుగంటోన్న జగన్.. ఆ దిశలోనే బడ్జెట్లో సంక్షేమానికి అధిక ప్రాధాన్యం ఇచ్చారు. తన పేరిట రెండు పథకాలను తీసుకొచ్చి.. వైఎస్‌లాగే జగన్ అనే ఓ బ్రాండ్‌ను క్రియేట్ చేసే దిశగా అడుగులేస్తున్నారు.