ఏపీ స్పెషల్ ప్యాకేజీ: ఊరించి తుస్సుమనిపించిన కేంద్రం

ప్రత్యేక హోదా ఎలాగూ రాదని ఫిక్సయిపోయింది.. కనీసం ప్రత్యేక ప్యాకేజీ అయినా కేంద్రం విదిలిస్తుందేమోనని ఎదురుచూసిన ఐదుకోట్ల ఆంధ్రుల ఆశలు మళ్లీ వమ్మయ్యాయి. బుధవారం నాడు ఉదయం నుండి రాత్రి 11 గంటల వరకు ఆర్థిక మంత్రి అరుణ్ జైట్లీ ఆంధ్ర రాష్ట్రానికి ప్రత్యేక ప్యాకేజీ గురించి ప్రకటిస్తారని పెద్ద ఎత్తున ప్రచారం జరిగింది. ఎక్కడెక్కడి మీడియా అంతా ఢిల్లీలో పీఎంవో కార్యాలయం వద్ద, ఇటు జైట్లీ కార్యాలయం వద్ద పడిగాపులు పడింది. ఇదిగో అదిగో అంటూ సమయాన్ని పొడిగించుకుంటూ వెళ్లి చివరకు తాపీగా రాత్రి 11 గంటలకు విలేకరుల సమావేశానికి వెంకయ్య సమేతంగా వచ్చిన అరుణ్ జైట్లీ ఇప్పటివరకు కేంద్ర మంత్రులు, బీజేపీ నేతలు షరామామూలుగా వల్లెవేస్తూ వచ్చిన విషయాలనే చెబుతూ అందరినీ నిరుత్సాహపరిచారు. ఇప్పటి వరకు రాష్ట్రానికి కేంద్రం ఏమేమి చేసిందో చెప్పేందుకు ప్రయత్నించారే తప్పించి ఏమి ఇవ్వబోతున్నామనే విషయాన్ని మాత్రం తెలివిగా దాటవేశారు. ఇప్పటి వరకు రెవెన్యూ లోటు కింద ఆంధ్రకు రూ.3975 కోట్లు విడుదల చేశామన్నారు. మిగిలిన మొత్తాన్ని విడతల వారీగా విడుదల చేస్తామన్నారు. విభజన వల్ల ఆంధ్రప్రదేశ్ నష్టపోయిందనే సంగతి తమకు తెలుసన్నారు. 14వ ఆర్థిక సంఘం సిఫారసుల మేరకు రెవెన్యూ లోటు భర్తీచేసేందుకు ప్రయత్నిస్తున్నామన్నారు. రైల్వే జోన్ విషయం గురించి మంత్రి సురేశ్ ప్రభు తీవ్రంగా పరిశీలిస్తున్నారన్నారు.

ఇదిలా ఉండగా బుధవారం నాడు జైట్లీ ఆంధ్రులకు కనీసం ఎంత లేదన్నా రూ.లక్షన్నర కోట్ల మేరకు ఆర్థిక ప్యాకేజీని ప్రకటిస్తారని మీడియాలో ప్రచారం జరిగింది. రోజంతా గంటకు అరగంటకు ఆంధ్ర రాష్ట్రానికి కేంద్రం అదివ్వబోతోంది.. ఇదివ్వబోతోందంటూ లీకుల మీద లీకులను ఇచ్చారు. దాంతో ఆంధ్రులంతా తమకు ఏదో కేంద్రం ఇచ్చేయబోతోందంటూ లేని ఆశలను తెచ్చి పెట్టుకున్నారు. కానీ, చివరకు గతంలో ఏం జరిగిందో ఇప్పుడూ అదే జరిగింది. మరోమారు తాము దగా పడ్డామని కొంతమంది వ్యాఖ్యానించారు.