Jana Sena: పవన్ కళ్యాణ్‌కు మరోసారి కంటి ఆపరేషన్

జనసేన అధినేత పవన్ కళ్యాణ్‌కు మరోసారి కంటి ఆపరేషన్ జరిగింది. గత నాలుగు నెలలుగా కంటి సమస్యతో ఇబ్బంది పడుతున్న పవన్ కళ్యాణ్ జూన్ నెలలో హైదరాబాద్‌లోని ఎల్వీ ప్రసాద్ కంటి ఆస్పత్రి వైద్యులను సంప్రదించారు. పవన్ ఎడమ కన్నులో చిన్న కురుపు ఉన్నట్లు వైద్యులు గుర్తించారు. దీనికి శస్త్రచికిత్స ఒక్కటే మార్గమని చెప్పారు. అయితే ఆంధ్రప్రదేశ్‌లో పవన్ ప్రజా పోరాట యాత్ర చేపట్టడంతో శస్త్ర చికిత్స చేయించుకోలేదు. కంటిలో దుమ్ము, ధూళి పడకుండా నల్ల కళ్లద్దాలు వాడేవారు.

అయినప్పటికీ క్రమేనా కంటి నొప్పి ఎక్కువ కావడంతో కిందటి నెల శస్త్రచికిత్స చేయించుకున్నారు. ఎల్వీ ప్రసాద్ ఆస్పత్రి వైద్యులు శస్త్రచికిత్స చేసి కంటిలో కురుపును తొలగించారు. అనంతరం విశ్రాంతి అవసరమని డాక్టర్లు సూచించారు. కానీ, శస్త్ర చికిత్స తరవాత కూడా ప్రజా పోరాట యాత్రను కొనసాగించడంతో జనసేనానికి విశ్రాంతి లేకుండా పోయింది. తగినంత విశ్రాంతి లేకపోవడంతో కంటికి ఇన్ఫెక్షన్ సోకింది. దీంతో ఎల్వీ ప్రసాద్ కంటి ఆస్పత్రి వైద్యుల సలహా మేరకు పవన్ గురువారం మరోసారి కంటికి ఆపరేషన్ చేయించుకున్నారు. ఇప్పుడైనా తగినంత విశ్రాంతి తీసుకోవాలని డాక్టర్లు పవన్‌కు సూచించారు.