విశాఖలో ‘జనసేనా’ని.. ఫ్యాన్స్ హంగామా!

ఉద్ధానం కిడ్నీ బాధితుల సహాయార్థం ఏర్పాటుచేసిన ప్రత్యేక కార్యక్రమంలో పాల్గొనడానికి జనసేన అధినేత పవన్ కల్యాణ్ ఆదివారం మధ్యాహ్నం విశాఖపట్నం చేరుకున్నారు. ఉదయం నుంచే విశాఖ ఎయిర్‌పోర్టుకు పవన్ అభిమానులు, జనసేన కార్యకర్తలు భారీగా చేరుకున్నారు. ఎయిర్‌పోర్టు ఆవరణమంతా జనసేన జెండాలతో నిండిపోయింది. ప్రత్యేక విమానంలో విశాఖ చేరుకున్న పవన్ కల్యాణ్ అక్కడి నుంచి నేరుగా పోతుల మల్లయ్యపాలెంలోని కన్వెన్షన్ సెంటర్‌కు బయలుదేరారు. ఈరోజు అక్కడ హార్వర్డ్ యూనివర్సిటీ డాక్టర్లతో ఉద్ధానం కిడ్నీ సమస్యలపై పవన్ భేటీ అవుతారు. డాక్టర్లతో ఈరోజు చర్చించిన తరవాత కిడ్నీ సమస్య నివారణ కోసం ఓ ప్రణాళికను సిద్ధం చేసుకుని.. రేపు ముఖ్యమంత్రి చంద్రబాబును కలవనున్నారు.

పవన్ కల్యాణ్ ఈరోజు విశాఖలోనే బసచేయనున్నారు. మరోవైపు విశాఖ ఎయిర్‌పోర్టులో పవన్ కల్యాణ్‌కు ఘనస్వాగతం లభించింది. పవన్ అభిమానులు, జనసేన కార్యకర్తలు అరుపులు, కేకల మధ్య ఎయిర్‌పోర్టు వద్ద కారులోకి ఎక్కారు పవన్. తమ అభిమాన హీరోపై అభిమానులు పూల వర్షం కురిపించారు. అభిమానుల హంగామా మధ్యే పవన్ వాహనం ముందుకు బయలుదేరింది. అభిమానులు, జనసేన కార్యకర్తల కలసి ర్యాలీగా పోతుల మల్లయ్యపాలేనికి పవన్ బయలుదేరారు.

కాగా, పవన్ రాక నేపథ్యంలో విశాఖపట్నం చుట్టుపక్కల ప్రాంతాల నుంచి అభిమానులు భారీగా నగరానికి తరలివస్తున్నారు. అనకాపల్లి, దువ్వాడ, అచ్యుతాపురం, పరవాడ, కొత్తవలస ప్రాంతాల నుంచి జనసేన కార్యకర్తలు బైక్ ర్యాలీలు నిర్వహిస్తూ నగరానికి చేరుకున్నారు. మరోవైపు శనివారం విశాఖకు వచ్చిన హార్వర్డ్ యూనివర్సిటీ వైద్యుల బృందం బాధితులను నేరుగా కలుసుకుని సమస్య మూలాలను కనుగునే ప్రయత్నం చేసింది. సమస్య పరిష్కారానికి ఉద్దానం కేంద్రంగా రీసెర్చ్ సెంటర్‌ను ఏర్పాటు చేస్తామని ప్రొఫెసర్ డాక్టర్ జోసెఫ్ వెల్లడించారు. అయితే సమస్య పరిష్కారానికి ఎంత కాలం పడుతుందో ఇప్పుడే చెప్పలేమని అన్నారు.