ఎమ్మెల్యే ప్రాణాల్నే కాపాడలేని వ్యక్తి ఏపీ సీఎం: పవన్

కేంద్రలో అధికారంలో ఉన్న బీజేపీని వెనకేసుకు రావడానికి తానేమీ ఏపీ సీఎం చంద్రబాబు నాయుడులా అవకాశవాదిని కాదన్నారు జనసేన అధినేత పవన్ కల్యాణ్. సామాజిక మార్పు కోసమే జనసేన పార్టీని స్థాపించానని, బీజేపీలో, లేక ఇతర పార్టీలలో కలపడానికి కాదని వ్యాఖ్యానించారు. తూర్పుగోదావరి జిల్లా కత్తిపూడిలో శనివారం జరిగిన బహిరంగ సభలో జనసేన అధినేత ఏపీ సీఎం చంద్రబాబుపై తీవ్రంగా మండిపడ్డారు.

కేంద్రం మెడలు వంచేందుకు జాతీయ నేతలను కూడగడుతున్నానని చెబుతున్న చంద్రబాబుకు ప్రధాని నరేంద్ర మోదీతో గొడవ పెట్టుకునే నైతిక బలం లేదని అభిప్రాయపడ్డారు. టీడీపీ అవినీతిలో భాగస్వామ్యం పంచుకోవడం ఇష్టం లేని కారణంగా తాను ఒక్క పదవిని కూడా స్వీకరించలేదని పేర్కొన్నారు. డ్వాక్రా మహిళలను టీడీపీ కార్మికులుగా చేశారని చంద్రబాబును విమర్శించారు. ఎమ్మెల్యేల ప్రాణాలను కాపాడలేని చంద్రబాబు రాష్ట్ర ముఖ్యమంత్రిగా సమర్ధుడేనా అని పవన్ సూటిగా ప్రశ్నించారు.

వియ్యంకుడికి పోలవరం కాంట్రాక్టు పనులు ఇప్పించడంలో ఉన్న ఉత్సాహం.. తన నియోజకవర్గంలో కాలుష్యాన్ని నివారించడంలో లేదంటూ ఆర్థికమంత్రి యనమల రామకృష్ణుడిని ఎద్దేవా చేశారు. ఏపీకి అన్యాయం జరిగిందనిపిస్తే ప్రత్యేక హోదా కోసం ఉమ్మడిగా పోరాటం చేసేందుకు టీడీపీ సిద్ధంగా ఉండాలన్నారు. ఇలాంటి విషయాలలో యనమల, చంద్రబాబుకు సలహా ఇవ్వడం మంచిదన్నారు. పంచాయతీ ఎన్నికల్లో సైతం గెలవలేని నారా లోకేశ్, పంచాయతీ రాజ్‌ శాఖా మంత్రిగా ఉన్నారని పవన్ వ్యాఖ్యానించారు.