బొకే పంపి విష్ చేసిన మీడియా అధినేత.. పవన్ కృతజ్ఞతలు

జనసేన అధినేత, పవర్ స్టార్ పవన్ కళ్యాణ్ పుట్టినరోజు వేడుకలను రెండు తెలుగు రాష్ట్రాలతో పాటు ప్రపంచ వ్యాప్తంగా ఉన్న ఆయన అభిమానులు ఘనంగా జరుపుకున్నారు. అయితే ఎప్పటిలానే పవన్ కళ్యాణ్ తన పుట్టినరోజు వేడుకలకు దూరంగా ఉన్నారు. ఎంతో మంది ట్విట్టర్ ద్వారా పవన్‌కు పుట్టినరోజు శుభాకాంక్షలు తెలిపారు. వీరిలో సినీ, రాజకీయ ప్రముఖులు కూడా ఉన్నారు. రామోజీ గ్రూపు సంస్థల చైర్మన్ రామోజీరావు.. పవన్‌కు పుష్ఫగుచ్ఛం పంపి శుభాకాంక్షలు తెలియజేశారు. ఇక ఆంధ్రప్రదేశ్ ముఖ్యమంత్రి చంద్రబాబు నాయుడు, మంత్రి నారా లోకేష్ ట్విట్టర్ ద్వారా పవన్‌కు శుభాకాంక్షలు తెలిపారు. తనకు వస్తున్న బర్త్‌డే విషెస్‌పై జనసేనాని స్పందించారు. ఈ మేరకు పవన్ కళ్యాణ్ పేరిట జనసేన పార్టీ ఒక ప్రెస్ నోట్‌ను విడుదల చేసింది.

చిన్ననాటి నుంచి పుట్టిన రోజు వేడుకలు జరుపుకోవడం తనకు అలవాటు లేదని పవన్ కళ్యాణ్ పేర్కొన్నారు. అందుకే ఈరోజు (సెప్టెంబర్ 2) తన పుట్టిన రోజు అయినప్పటికీ ఎప్పటిలానే తాను ఎటువంటి వేడుక చేసుకోలేదని స్పష్టం చేశారు. అయితే తనపై అభిమానంతో రెండు రాష్ట్రాలు, విదేశాలలో తన పుట్టినరోజు వేడుకలు జరిపిన జనసైనికులు, అభిమానులు, వివిధ మాధ్యమాల ద్వారా శుభాకాంక్షలు తెలిపిన శ్రేయోభిలాషులకు పేరు పేరునా ధన్యవాదాలు తెలుపుతున్నట్లు జనసేనాని వెల్లడించారు. ‘మీరే నా బలం. మీరే నా ఆనందం’ అంటూ అభిమానులకు ఉత్సాహాన్ని అందించారు.

అలాగే తనకు ప్రత్యేకంగా శుభాకాంక్షలు తెలిపిన రామోజీరావు, చంద్రబాబు, లోకేష్‌కు హృదయపూర్వక కృతజ్ఞతలను పవన్ తెలియజేశారు. ‘పుష్పగుచ్ఛం పంపి శుభాకాంక్షలు తెలిపిన రామోజీ గ్రూపు సంస్థల అధినేత, ఈనాడు చీఫ్ ఎడిటర్ రామోజీరావు గారికి, ట్విట్టర్లో శుభాకాంక్షల సందేశం పంపిన ఆంధ్రప్రదేశ్ ముఖ్యమంత్రి నారా చంద్రబాబు నాయుడు గారికి, నారా లోకేష్ గారికి, జనసేన రాజకీయ వ్యవహారాల కమిటీ సభ్యులు, ఆంధ్రప్రదేశ్, తెలంగాణలోని జనసేన నాయకులు, వ్యక్తిగతంగా శుభాకాంక్షలు తెలిపిన ప్రతి ఒక్కరికీ నా హృదయపూర్వక కృతజ్ఞతలు’ అని పవన్ పేర్కొన్నారు.