వచ్చే ఎన్నికల్లో జనసేన లేకుండా ప్రభుత్వం ఏర్పడదు: పవన్

జనసేన అధినేత, నటుడు పవన్ కల్యాణ్ పోరాట యాత్ర ప్రస్తుతం పశ్చిమగోదావరి జిల్లాలో కొనసాగుతోంది. తమ సామాజిక వర్గానికి గట్టిపట్టున్న ఉభయ గోదావరి జిల్లాలపైనే పవన్ దృష్టిసారించినట్టు అర్థమవుతోంది. వచ్చే ఎన్నికలే లక్ష్యంగా యాత్ర కొసాగిస్తోన్న జనసేనాని, చింతలపూడిలో శనివారం జరిగిన బహిరంగ సమావేశంలో ప్రసంగించారు. ఈ సందర్భంగా పవన్ మాట్లాడుతూ... 2019 ఎన్నికల్లో తామే కీలకమని, తమ సహకారం లేకుండా ఏ పార్టీ రాష్ట్రంలో ప్రభుత్వం ఏర్పాటుచేయలేవని వ్యాఖ్యానించారు. ప్రతి ఒక్కరికీ అండగా ఉండే ప్రభుత్వాన్ని స్థాపిస్తామన్న పవన్, 2019-24 మధ్య దేశ రాజకీయాల్లో సమూల మార్పులు సంభవించి, సరికొత్త నాయకత్వం రానుందని జోస్యం చెప్పారు.

ఏపీలోనూ కర్ణాటక తరహాలో మూడు పార్టీల మధ్య పోటీ ఉంటుందని, సంకీర్ణ ప్రభుత్వం అనివార్యమని పేర్కొన్నారు. జనసేనకు ఐదు, ఆరే సీట్లు వస్తాయా? అని అందరూ మాట్లాడుకుంటున్నారని, ఎన్నొచ్చినా తమ మద్దతు లేకుండా ప్రభుత్వం ఏర్పడబోదని పవన్ స్పష్టం చేశారు. వచ్చే ఎన్నికల్లో తమ పార్టీ కీలకం కానుందనీ.. టీడీపీ, వైసీపీలు జనసేన మద్దతు లేకుండా ప్రభుత్వాన్ని ఏర్పాటు చేయలేవని లగడపాటి రాజగోపాల్‌ తనతో అన్నారని వివరించారు. ప్రస్తుతం ఆ పార్టీలకు సమదూరంలో ఉన్నామని, వారి బాధ్యతలను గుర్తు చేస్తూ, పోరాడుతున్నామని పవన్ అన్నారు.

పవన్‌కల్యాణ్‌కు ప్రాణహాని ఉంటే భద్రత కల్పిస్తామని ముఖ్యమంత్రి అంటున్నారని, ప్రాణం మీద ఆశలు వదులుకునే రాజకీయాల్లోకి వచ్చానని, తనపై దాడి చేసేందుకు ఎంతో మంది ప్రయత్నిస్తున్నారని పవన్‌ ఆరోపించారు. ప్రజాస్వామ్యయుత పోరాటానికైనా, హింసాత్మక పోరాటానికైనా తాము సిద్ధమేనని, ఇందులో ఏది కావాలో టీడీపీ ఎంపిక చేసుకోవాలని సవాల్ విసిరారు. జనసేన పిడికిలికి ఉన్న బలం రెండు చేతివేళ్లకు ఉండదని, టీడీపీ ప్రభుత్వం తన భద్రతకు నలుగుర్ని పంపితే తిరస్కరించానని, వీరిలో ఒకరు తన సమాచారాన్ని ముఖ్యమంత్రికి చేరవేసేవారని ధ్వజమెత్తారు.