ఫెడరల్ ఫ్రంట్: కేసీఆర్‌తో మాజీ ప్రధాని దేవేగౌడ భేటీ

మాజీ ప్రధాని, జేడీఎస్‌ అధినేత హెచ్‌డీ దేవేగౌడ ముఖ్యమంత్రి కల్వకుంట్ల చంద్రశేఖర్‌రావుతో భేటీ అయ్యారు. ఆదివారం (జులై 1) మధ్యాహ్నం ప్రగతిభవన్‌లో సమావేశమైన ఇరువురు నేతలు ఫెడరల్‌ ఫ్రంట్‌, జాతీయ రాజకీయాలపై చర్చించారు. కొత్త కూటమి ఏర్పాటులో సహకారం అందించాల్సిందిగా దేవేగౌడను కేసీఆర్‌ కోరారు. తెలంగాణ ఐటీ, మున్సిపల్ శాఖ మంత్రి కేటీఆర్‌, మేయ‌ర్ బొంతు రామ్మోహ‌న్‌, ప‌లువురు ఎంపీలు, ఎమ్మెల్యేలు కూడా ఈ సమావేశంలో పాల్గొన్నారు.

ఫెడరల్ ఫ్రంట్ ఏర్పాటుపై చర్చలు సాగుతుండగానే కర్ణాటకలో కాంగ్రెస్ పార్టీతో కలిసి జేడీఎస్ ప్రభుత్వాన్ని ఏర్పాటు చేసిన విషయం తెలిసిందే. ఈ నేపథ్యంలో దేవేగౌడ, కేసీఆర్ భేటీకి ప్రాధాన్యం సంతరించుకుంది. దేశంలో కాంగ్రెస్‌, బీజేపీ పార్టీలకు ప్రత్యామ్నాయంగా మూడో ఫ్రంట్ ఏర్పాటే లక్ష్యంగా కేసీఆర్ ప్రయత్నాలు ప్రారంభించారు. ఈ క్రమంలో ఆయన బెంగళూరుకు వెళ్లి దేవెగౌడతో పాటు ఆయన కుమారుడు, కర్ణాటక ప్రస్తుత సీఎం కుమారస్వామితో సమావేశమయ్యారు. అంతకుముందు పశ్చిమ బెంగాల్‌ సీఎం మమతా బెనర్జీ, ఒడిషా ముఖ్యమంత్రి నవీన్‌ పట్నాయక్‌తోనూ చర్చించారు.

ప్రగతిభవన్‌లో దేవేగౌడకు సాదర స్వాగతం లభించింది. సీఎం కేసీఆర్‌ ఆయణ్ని ఘనంగా సన్మానించారు. దేవేగౌడకు శాలువా కప్పి సత్కరించి, కాకతీయ కళాతోరణాన్ని జ్ఞాపికగా అందజేశారు. ఎంపీ సుబ్బిరామిరెడ్డి మనవడి వివాహానికి హాజరయ్యేందుకు శనివారం (జూన్ 30) రాత్రి దేవేగౌడ హైదరాబాద్‌ విచ్చేశారు. కేసీఆర్‌తో భేటీ అనంతరం ఆయన బేగంపేట విమానాశ్రయం నుంచి ప్రత్యేక విమానంలో బెంగళూరు బయలుదేరి వెళ్లారు..