రేపే జేఎఫ్‌సీ తొలి భేటీ: పాల్గొననున్న పవన్, జేసీ, ఉండవల్లి

ఏపీకి ప్రత్యేక హోదా సహా విభజన చట్టంలోని హామీల అమలు కోసం గురువారం తొలి జేఎఫ్‌సీ సమావేశం జరగనుంది. ఫిబ్రవరి 16న మధ్యాహ్నం రెండు గంటలకు హైదరాబాద్‌లో దసపల్లా హోటల్లో జాయింట్ ఫాక్ట్స్ ఫైండింగ్ కమిటీ సమావేశం ఉంటుంది. మరుసటి రోజు కూడా భేటీ కొనసాగుతుందని జనసేన పార్టీ తెలిపింది. ఈ సమావేశంలో పవన్ కల్యాణ్‌తోపాటు జేపీ, ఉండవల్లి అరుణ్ కుమార్, కొణతాల రామకృష్ణ తదితర నేతలు పాల్గొననున్నారు. వామపక్ష నేతలతోపాటు పలు రంగాలకు చెందిన నిపుణులు కూడా ఈ సమావేశంలో పాల్గొంటారు.

గురువారం ఉదయం ట్యాంక్ బండ్ వద్దనున్న అంబేద్కర్ విగ్రహానికి పవన్ కల్యాణ్ పూలమాల వేసి అంజలి ఘటిస్తారు. అనంతరం జేఎఫ్‌సీ సమావేశంలో పాల్గొనడానికి వెళ్తారని జనసేన స్పష్టం చేసింది.

కేంద్రం నుంచి రాష్ట్రానికి అందిన సాయం, పోలవరం ప్రాజెక్టుపై కేంద్ర, రాష్ట్ర ప్రభుత్వాలు చెబుతున్న లెక్కలకు ఫిబ్రవరి 15లోగా తనకు శ్వేతపత్రం విడుదల చేయాలని పవన్ కల్యాణ్ ఏపీ సర్కారును డిమాండ్ చేసిన సంగతి తెలిసిందే. కానీ ప్రత్యేకంగా చెప్పాల్సిందేం లేదని చంద్రబాబు వ్యాఖ్యానించిన నేపథ్యంలో జేఎఫ్‌సీ భేటీ ప్రాధాన్యం సంతరించుకోనుంది.