Karimnagar Road Accident: కరీంనగర్ ప్రమాదం.. ఆర్టీసీ డ్రైవర్ నిర్లక్ష్యమే కారణం

మూడు రోజుల కిందట కరీంనగర్‌ జిల్లా మానకొండూరు మండలం చెంజర్ల వద్ద జరిగిన ఘోర రోడ్డు ప్రమాదంలో ఏడుగురు దుర్మరణం చెందిన విషయం తెలిసిందే. అయితే ఈ ప్రమాదం బస్సు డ్రైవర్‌ తప్పిదం వల్లే జరిగిందని ఓ పోలీసు అధికారి వెల్లడించారు. రోడ్డు ప్రమాదంలో లారీ, బస్సు డ్రైవర్‌‌లపై కేసు నమోదుచేసిన పోలీసులు, ఆ దిశగా విచారణ చేపట్టారు. ఈ ప్రమాదానికి బస్సు డ్రైవరే కారణమని, ఆయన అతివేగం, నిర్లక్ష్యంగా వాహనం నడిపినట్టు ప్రత్యక్ష సాక్షులు, ప్రయాణికులు పేర్కొన్నారు. మంగళవారం హుజురాబాద్‌ నుంచి బయల్దేరిన బస్సు కొద్దిసేపటికే మరో వాహనాన్ని అధిగమిస్తోన్న సమయంలో స్కూల్ బస్సును ఢీకొట్టబోయి తృటిలో ప్రమాదం తప్పింది. అలాగే శంకరపట్నం దాటాక ఓ ద్విచక్రవాహనాన్ని అధిగమించబోయి రోడ్డు పక్కకు దిగింది. అయినా డ్రైవర్‌ తన వేగాన్ని తగ్గించలేదు సరికదా, రోడ్డు దాటుతున్న ఆవును తప్పించే క్రమంలో కల్వర్టును ఢీకొట్టబోయాడు. ఈ ప్రమాదం కూడా తప్పడంతో బస్సు మెల్లగా నడపాలని తాను చెబితే డ్రైవర్‌ తనపై అసహం వ్యక్తం చేశాడని ఓ ప్రయాణికుడు ఆవేదన వ్యక్తం చేశాడు.

చెంజర్ల వద్ద బైక్‌ను ఓవర్‌టేక్‌ చేస్తుండగా బస్సు పూర్తిగా కుడి వైపునకు వచ్చిందని, లారీని గమనించిన డ్రైవర్‌ తిరిగి ఎడమవైపు తిప్పడంతో ద్విచక్రవాహనాన్ని ఢీకొందని సాక్షులు తెలియజేశారు. బస్సు ముందుభాగం ఎడమవైపునకు వెళ్లగా మధ్యలో లారీ ఢీకొన్నట్లు ప్రత్యక్ష సాక్షులు పోలీసులకు వివరించారు. డ్రైవర్‌ నిర్లక్ష్యంపైనే నివేదిక రూపొందించామని, త్వరలో వివరాలు వెల్లడిస్తామని పోలీస్‌ కమిషనర్‌ తెలిపారు. వారం వ్యవధిలో వరుసగా జరిగిన రెండు భారీ ప్రమాదాల్లో ఆర్టీసీ బస్సులే ఉండటంపై ఆ సంస్థ దృష్టిసారించింది. ఈ ఘటనల్లో మొత్తం 21 మంది ప్రాణాలు కోల్పోయారు. ఇక రెండు ప్రమాదాలకూ అధిక వేగమే కారణమని పోలీసుల విచారణలో తేలింది. ఇటీవల కాలంలో ఆర్టీసీ బస్సులు ఇంతటి ప్రమాదాలకు కారణమైన సందర్భాలు లేకపోవడంతో అధికారులు అప్రమత్తమయ్యారు. ప్రస్తుతం అమల్లో ఉన్న శిక్షణ విధానాన్ని సమీక్షించి కొత్త పద్దతులను అనుసరించే మార్గాలను పరిశీలిస్తున్నారు.