ఆమరణ నిరాహారదీక్ష చేయనున్న పవన్‌కు నా మద్దతు: కత్తి!

కొద్దిరోజులపాటు పవన్ కల్యాణ్‌పై విమర్శలకు సెలవు ప్రకటించిన సినీ విమర్శకుడు కత్తి మహేశ్ మరోసారి జనసేనానిని టార్గెట్ చేశారు. బడ్జెట్ కేటాయింపుల్లో ఆంధ్రప్రదేశ్‌కు జరిగిన అన్యాయంపై జనసేన అధినేత బుధవారం మీడియా సమావేశం నిర్వహించిన విషయం తెలిసిందే. ఈ సందర్భంగా ఆయన మీడియాతో మాట్లాడుతూ.. విభజన చట్టంలో ఇచ్చిన హామీలను కేంద్రం నెరవేర్చడంలేదని, వీటిపై పోరాడటానికి తనశక్తి సరిపోవడంలేదని వ్యాఖ్యానించారు. అంతేకాదు ఉండవల్లి అరుణ్ కుమార్, జయప్రకాష్ నారాయణ లాంటి మేధావులను కలుపుకుని ఒక జాయింగ్ యాక్షన్ కమిటీగా ఏర్పడి ముందుకు వెళ్తానని ఆయన ప్రకటించారు. ఈ వ్యాఖ్యలపై సినీ కత్తి మహేశ్ తన వరుస ట్వీట్లతో విమర్శలు గుప్పించారు. ‘ప్రత్యేక హోదాకోసం... విభజన హామీల కోసం జాయింట్ యాక్షన్ కమిటీ.. జనసేన నాయకత్వం.. ఉండవల్లి, జేపీ లాంటి మేధావులతో కమిటీ... వినడానికి బాగుంది... చలసాని శ్రీనివాస్, హీరో శివాజి, వామపక్షాలు, ప్రజాసంఘాలు ఏర్పాటు చేసిన కమిటీ ఆల్రెడీ ఉంది. పవన్ కళ్యాణ్ చేరడమే తరువాయి’ అంటూ ట్వీట్ చేశారు.

అంతేకాదు ‘ఆంధ్రప్రదేశ్‌కు ప్రత్యేకహోదా కోసం ఈ నెల 21 నుంచీ న్యూఢిల్లీ‌లోని జంతర్ మంతర్ వద్ద ఆమరణ నిరాహారదీక్ష చేయనున్న జనసేన పార్టీ అధ్యక్షులు శ్రీ పవన్ కళ్యాణ్‌కు నా మద్దతు తెలుపుతున్నాను..."కనీసం ప్రశ్నిస్తున్నాను. దానికి సంతోషించండి." ఎంటయ్యాబాబు! ఎక్కడి నుంచి దిగివచ్చావ్? ఎవరి మీద దయతలుస్తున్నావ్?’ అంటూ వ్యంగ్యాస్త్రాలు సంధించాడు.

‘గల్లా జయదేవ్ చాలా బాగా మాట్లాడారు. నిజమే, అన్నివేళలా అందరినీ మూర్ఖుల్ని చెయ్యడం కష్టం. ఖర్మ కొద్దీ అది బీజేపీకి ఎంత వర్తిస్తుందో, తెలుదేశానికి అంతే వర్తిస్తుంది. ఆంధ్రప్రదేశ్ జనతా చూస్తూనే ఉన్నారు. గమనిస్తూనే ఉన్నారు’ అంటూ మరో ట్వీట్‌లో పేర్కొన్నారు... ‘కాంగ్రెస్ విధానాలు బాగలేవనే బీజేపీని గద్దెనెక్కించింది. మీకు చేతకాక మళ్లీ ఇప్పుడు కాంగ్రెస్ మీద పడి ఏడవటం ఏమిటి మోడీ ? కాంగ్రెస్ 60 సంవత్సరాలలో చేసిన నష్టాన్ని మీరు 4 సంవత్సరాలలో చేసేశారు. ఆర్థిక వ్యవస్థని, రిజర్వ్ బ్యాంకుని, సీబీఐని చివరికి సుప్రీం కోర్టుని కూడా నాశనం చేశార’అంటూ బీజేపీపై కత్తి విమర్శలు గుప్పించారు.