నువ్వు జనసేన కట్టప్పవు.. కానీ విలువలేదు: కత్తి మహేష్

జనసేన పార్టీపై, పవన్ కళ్యాణ్‌పై రోజుకో రకంగా విమర్శలు చేసే కత్తి మహేష్.. మరోసారి తన నోటికి పనిచెప్పారు. వాసుదేవ్‌ను జనసేన పార్టీ వ్యూహకర్తగా నియమించుకోవడంపై కత్తి మహేష్ పలు విమర్శలు చేశారు. ఏ మాత్రం అనుభవంలేని, ఆంధ్రప్రదేశ్ రాజకీయాలపై పట్టులేని వాసుదేవ్‌ వ్యూహకర్తగా నియమించడంతో జనసేనపై అంచనాలు మరింత తగ్గిపోయాయి అంటూ వ్యాఖ్యానించారు. అలాగే పవన్ కళ్యాణ్ వీరాభిమాని కళ్యాణ్ దిలీప్ సుంకరపై కూడా మహేష్ పలు ఆసక్తికర వ్యాఖ్యలు చేశారు. ఈ మేరకు ట్విట్టర్‌లో ఓ వీడియోను ట్వీట్ చేశారు.

బీజేపీ కార్యకర్త నుంచి జనసేన వ్యూహకర్తగా ఎదిగిన వాసుదేవ్‌కి అభినందనలు అంటూ కత్తి మహేష్ ప్రారంభించారు. జనసేన పార్టీ పట్ల, పవన్ కళ్యాణ్ పట్ల కళ్యాణ్ దిలీప్ సుంకర కట్టప్ప అంటూ వ్యాఖ్యానించారు. ఇంతగా నమ్మే ఒక భక్తుడు, పార్టీ కార్యకర్త జనసేనకు ఇంకెవ్వరూ దొరకని అన్నారు. కాకపోతే కళ్యాణ్‌కు ఇవ్వాల్సిన విలువ ఎవ్వరూ ఇవ్వట్లేదని అభిప్రాయపడ్డారు. వాసుదేవ్ కన్నా కళ్యాణ్ దిలీప్ సుంకర మంచి వ్యూహకర్త అవుతాడని తాను నమ్ముతున్నట్లు చెప్పారు. అయితే అతనిపై పార్టీకి ఎందుకు నమ్మకం కలగడంలేదో తనకు అర్థం కానీ విషయం అన్నారు.

వాసుదేవ్ బీజేపీ కార్యకర్త అని అందరికీ తెలిసినా అతన్ని వ్యూహకర్తగా నియమించి జనసేనాని ఎందుకు చతికిలపడుతున్నారో తనకు అర్థం కావడంలేదని మహేష్ వ్యాఖ్యానించారు. ఏ మాత్రం అనుభవంలేని, ఆంధ్రప్రదేశ్ రాజకీయాలపై అవగాహనలేని, కుల సమీకరణాలు తెలియని వాసుదేవ్‌ను డ్రైవింగ్ సీట్లో పవన్ కళ్యాణ్ ఎలా కూర్చోబెట్టారో అర్థం కావడంలేదన్నారు. జనసేనపై కాస్తో కూస్తో నమ్మకం ఉండేదని, పవన్ కళ్యాణ్ మరీ ఇలా సెల్ఫ్ గోల్స్ చేసుకుంటూ వెళ్తే రాష్ట్రంలో మూడో ప్రత్యామ్నాయం కూడా కాలేరోమోనని తనకే అనుమానంగా ఉందంటూ కత్తి మహేష్ ఆసక్తికర వ్యాఖ్యలు చేశారు.