ట్వీట్- హాట్..కత్తి మహేశ్ పై కేసు?

పవన్ కల్యాణ్ కు నిత్య విమర్శకుడు అయిన సినీక్రిటిక్ కత్తి మహేశ్ అనుకోని వివాదంలోకి అడుగువేశాడు. పవన్ కల్యాణ్ తాజా మీటింగుల నేపథ్యంలో ఆయనపై సెటైరిక్ ట్వీట్లను పెడుతున్న మహేశ్ మోడీపై ప్రయోగించిన ఒక ఉపమానం వివాదంగా మారుతోంది. ఈ విషయంలో భారతీయ జనతా పార్టీ నేతలు టక్కున స్పందించేసి.. మహేశ్ ను అడ్డంగా బుక్ చేశారు. సోషల్ మీడియా ద్వారానే మహేశ్ ట్వీటును పోలీసుల పరిగణనలోకి తీసుకెళ్లారు బీజేపీ ఎమ్మెల్యే రాజాసింగ్.

కత్తి మహేశ్ ట్వీటును రాజాసింగ్ రీట్వీట్ చేయడం, దాన్ని హైదరాబాద్ పోలీసులకు ట్యాగ్ చేయడం, ఆ వెంటనే పోలీసులు స్పందించేయడం.. చర్యలు తీసుకుంటామని వాళ్లూ ట్వీట్ చేయడం చకచకా జరిగిపోయాయి.

పవన్ కల్యాణ్ పై ధ్వజమెత్తుతూ కత్తి మహేశ్ ‘నరకహంతక మోడీ’ అని సంబోధించడం పట్ల భారతీయ జనతా పార్టీ ఎమ్మెల్యే రాజాసింగ్ అభ్యంతరం చెప్పారు. పాపులారిటీ కావాలనుకున్న వాళ్లంతా మోడీని విమర్శిస్తున్నారని ఆయన ట్వీట్ చేశారు. ప్రధానిని అలా సంబోధించడం పట్ల అభ్యంతరం చెబుతూ హైదరాబాద్ పోలీస్ ట్విటర్ అకౌంట్ ను ట్యాగ్ చేశాడాయన.

ఈ విషయంపై స్పందిస్తూ..‘తగిన చర్యలు తీసుకుంటాం.. సార్’ అని హైదరాబాద్ పోలీస్ నుంచి స్పందన వచ్చింది. మరి మోడీని ‘నరహంతకుడు’ అన్నందుకు కత్తి మహేశ్ పై కేసు నమోదు చేసే అవకాశాలున్నాయని తెలుస్తోంది.