రాష్ట్రమంతా ఒకేసారి పట్టాదార్ పాస్‌పుస్తకాలు: కేసీఆర్

మార్చి 11న రాష్ట్రవ్యాప్తంగా అన్ని గ్రామాల్లో ఒకేసారి పట్టాదార్ పాస్ పుస్తకాల పంపిణీ జరగాలని సీఎం కేసీఆర్ అధికారులను ఆదేశించారు. దీని కోసం ప్రతి గ్రామంలో ఒక నోడల్ అధికారిని నియమించాలని కలెక్టర్లను ఆదేశించారు. ప్రగతి భవన్‌లో మంగళవారం (జనవరి 16) ఆయన కలెక్టర్లతో సమీక్షా సమావేశం నిర్వహించారు. ఈ సమావేశంలో రెవెన్యూ రికార్డుల ప్రక్షాళన, పంచాయతీరాజ్ ఎన్నికలు, గ్రామ పంచాయతీల విధులు, మున్సిపల్ చట్ట సవరణపై చర్చించారు.

పాస్‌ పుస్తకాలను ఒక రోజు ముందే గ్రామాలకు తరలించాలని కలెక్టర్లను కేసీఆర్ ఆదేశించారు. దీని కోసం ప్రతి గ్రామానికి ప్రత్యేకంగా ఒక వాహనాన్ని ఏర్పాటు చేయాలని సూచించారు. ఈ కార్యక్రమంలో ప్రజాప్రతినిధులందరినీ భాగస్వామ్యం చేయాలని నిర్దేశించారు. పాస్‌ పుస్తకాల పంపిణీ కార్యక్రమానికి అవసరమైన నిధులను ప్రభుత్వం విడుదల చేస్తుందని సీఎం తెలిపారు.

ప్రభుత్వం కొత్త పంచాయతీరాజ్ చట్టం రూపకల్పనకు సిద్ధమైన నేపథ్యంలో.. పంచాయతీలు, సర్పంచులు, పాలకమండళ్లకు అధికారాలు, బాధ్యతలతో పాటు తండాలు, గూడేలను పంచాయతీలుగా మార్చే అంశంపైనా కలెక్టర్లతో సీఎం చర్చించారు.