మేం రోడ్లు వేయలేమా? అన్నింటి మీదా కేంద్రం పెత్తనమేనా?: కేసీఆర్

మనది పేరుకే సమాఖ్య వ్యవస్థ. కానీ అధికారాలన్నీ కేంద్రం వద్దే ఉన్నాయని కేసీఆర్ ఆవేదన వ్యక్తం చేశారు. ఆదివారం మీడియాతో మాట్లాడిన ఆయన కేంద్రంపై నిప్పులు చెరిగారు. ఉపాధి హామీ కూలీలకు కూడా ఢిల్లీ నుంచే సొమ్ముు చెల్లించాలా..? ఇక్కడి రాష్ట్ర ప్రభుత్వం చెల్లించలేదా అని ఆయన కేంద్రాన్ని ప్రశ్నించారు. ఆరోగ్యం, విద్య, వ్యవసాయం, పట్టణాభివృద్ధి విభాగాలను రాష్ట్రాలకు అప్పగించాలని టీఆర్ఎస్ అధినేత డిమాండ్ చేశారు. ఈ శాఖలతో కేంద్రానికి ఏం పని? అని ప్రశ్నించారు.

విదేశీ విధానం, సైన్యం, జాతీయ రహదారులు తదితర శాఖలే కేంద్రం పరిధిలో ఉండాలి. ప్రధాన మంత్రి గ్రామ్ సడక్ యోజనతో కేంద్రానికి ఏం పని? రాష్ట్ర ప్రభుత్వం గ్రామాల్లో రోడ్లు వేయలేదా? స్థానిక సంస్థలను పని చేయనివ్వడం లేదని కేసీఆర్ విమర్శించారు.

మన దేశంలోనూ అమెరికా తరహా సమాఖ్య వ్యవస్థ ఉండాలని కేసీఆర్ అభిప్రాయపడ్డారు. అమెరికాలో ప్రతి రాష్ట్రానికి సుప్రీం కోర్టు ఉంటుంది. నగర కమిషనర్ కిందే సిటీ పోలీస్ కమిషనర్ పని చేస్తారు. అక్కడ సుప్రీం బదులు ఫెడరల్ కోర్ట్ ఉంటుంది. రాష్ట్రాల మీద పెత్తనం ఉండదన్నారు.

అధికారాలన్నీ రాష్ట్రాలకు బదలాయించాలి. పరిమిత అధికారాలు మాత్రమే కేంద్రానికి ఉండాలి. రాష్ట్రాల అవసరాలకు అనుగుణంగా నిర్ణయాలు తీసుకునే వెసులుబాటు ఉండాలని కేసీఆర్ ఆకాంక్షించారు.

చదవండి: ​ తెలంగాణ ప్రజల దీవెనలతో.. దేశ రాజకీయాలకు దిశానిర్దేశం చేస్తా: కేసీఆర్

రిజర్వేషన్లు కూడా రాష్ట్ర పరిధిలోనే ఉండాలని తెలంగాణ సీఎం డిమాండ్ చేశారు. తెలంగాణలో 85 శాతం మంది దళితులు, గిరిజనులు, బీసీలు, ముస్లింలు. వారికి 50 శాతం లోపు రిజర్వేషన్లు ఇవ్వాలంటే ఎలా కుదురుతుందన్నారు.