TRS Working President: పార్టీ బాధ్యతలు స్వీకరించిన కేటీఆర్

టీఆర్ఎస్ వర్కింగ్ ప్రెసిడెంట్‌గా కేటీఆర్ (కల్వకుంట్ల తారక రామారావు) బాధ్యతలు స్వీకరించారు. సోమవారం ఉదయం తెలంగాణ భవన్‌లో వేద పండితుల ఆశీర్వచనాల తర్వాత.. కేటీఆర్ తన కేబిన్‌లో కూర్చొన్నారు. పార్టీ బాధ్యతలు స్వీకరించిన యువ నేతకు హోంమంత్రి మహమూద్ అలీ, హరీష్ రావు, మాజీ మంత్రులు, ఎంపీలు, ఎమ్మెల్యేలు, ఎమ్మెల్సీలు, నేతలు, కార్యకర్తలు అభినందనలు తెలిపారు. టీఆర్ఎస్ శ్రేణులు భారీగా తరలి రావడంతో తెలంగాణ భవన్, పరిసర ప్రాంతాల్లో పండుగ వాతావరణం నెలకొంది.

అంతకముందు.. ప్రగతి భవన్ నుంచి తెలంగాణ భవన్‌కు బయల్దేరే ముందు కేటీఆర్.. తల్లిదండ్రులు కేసీఆర్, శోభ ఆశీర్వాదం తీసుకున్నారు. తర్వాత సోదరి కవిత ఆయన నుదుట తిలకం దిద్ది హారతి ఇచ్చి శుభాకాంక్షలు తెలిపారు. అనంతరం ప్రగతి భవన్ నుంచి బయల్దేరి.. బసవ తారకం కేన్సర్ ఆస్పత్రి దగ్గరకు చేరుకొని.. అక్కడి నుంచి ర్యాలీగా బయల్దేరారు. వేలాదిమందిగా తరలివచ్చిన కార్యకర్తలతో ఆ మార్గం మొత్తం గులాబీ మయం అయ్యింది.

కళాకారుల ఆటపాటలు, నృత్యాల మధ్య కేటీఆర్ తెలంగాణ భవన్ కు చేరుకున్నారు. తెలంగాణ తల్లి, జయశంకర్ సార్ విగ్రహాలకు పూలమాలలు వేశారు. తెలంగాణ భవన్‌లో అడుగుపెట్టిన కేటీఆర్‌కు టీఆర్ఎస్ మహిళా నేతలు తిలకం దిద్ది.. హారతులు పట్టారు.